१६ असार, रौतहट ।
बागमती र लालबकैया खोलामा पानीको बहाब बढेपछि तटीय क्षेत्रका बासिन्दालाई सतर्क रहन जिल्ला प्रशासन कार्यालय रौतहटले आग्रह गरेको छ ।
गएरातिदेखि सुरु भएको भारी वर्षाका कारण ति खोलामा बहाब बढेको हो ।
रौतहटका प्रमुख जिल्ला अधिकारी इन्द्रदेव यादवले बागमतीको पानीको सतह पाँच सय मिलिभन्दा माथि रहे तटीय क्षेत्रमा खतरा हुने र अहिले बागमतीमा पाँच सय ३० मिलि पानी मापन भएका कारण सतर्क रहन आग्रह गरेको बताए ।
बागमती,लालबकैया,चादी लगाएतका खोला तथा नदीमा पानीको सहत बढ्दै जाँदा जिल्लाका दक्षिणी भेगका गाउँहरु डुवानमा पर्ने खतरा बढ्दै गएकाले जिल्ला प्रशासनले सतर्क रहन आग्रह गरेको हो ।
बागमती र लालबकैया खोलामा आउने बाढीका कारण जिल्ला सदरमुकाम गौर लगायतका अन्य नगरपालिका हरेक वर्ष डुवानमा पर्दे आएका छन् ।
