१७ असार, काठमाडौं ।
राष्ट्रिय सभाको आठौँ अधिवेशन बिहीवार (आज) देखि सुरु भएको छ । प्रतिनिधि सभा दोस्रो पटक विघटन भएको अवस्थामा माथिल्लो सदन अर्थात् राष्ट्रिय सभाको आठौँ अधिवेशन आजदेखि सुरु भएको हो ।
आजको बैठकमा सरकार पक्ष विपक्षी दलका नेताहरूले धारणा राखेका छन् । विपक्षी दलका नेताहरूले केपी शर्मा ओलीको सरकारले लोकतन्त्र, संविधान र संवैधानिक संरचना ध्वस्त बनाइरहेको बताएका छन् ।
नेपाली कांग्रेसका राष्ट्रिय सभा सदस्य राधेश्याम अधिकारीले ओलीले संविधान असफल बनाउन अध्यादेशमार्फत राज गरिरहेको आरोप लगाए । तीन वर्षमा ओली सरकारले व्यापारी पोस्न निकुञ्ज मास्नेदेखि सरकारी जमिन कौडीका भाउमा दिएको, भ्रष्टाचारलाई संरक्षण गरेको, सङ्घीयता असफल बनाउन प्रदेश र पालिकालाई दिएको अधिकार खोसेर लडाइँ गरिहेको लगायतका आरोप लगाए ।
संवैधानिक आयोगमा नियुक्तिको प्रक्रिया मिच्दै कार्यकर्ता भर्ना गरेर आयोगहरूलाई नै कमजोर बनाउने प्रयास भएको नेपाली कांग्रेसका राष्ट्रिय सभा सदस्य अधिकारीको भनाइ छ ।
यस्तै माओवादी केन्द्रका सदस्य दिनानाथ शर्माले राजाहरूले पनि संविधान मिच्ने आँट नगरेको स्मरण गराउँदै प्रधानमन्त्री ओलीले आफूलाई संविधानभन्दा माथि राखेर संविधान र लोकतन्त्रमाथि आक्रमण गरिरहेको बताए ।
ओलीको प्रतिगमन अहिलेको सवैभन्दा ठूलो सङ्कट रहेको भन्दै शर्माले ओलीलाई कसले कहाँबाट चलाइरहेको छ भन्दै प्रश्न गरे । भारतलाई खुसी पार्न चुरे बेच्ने सम्मको काम ओलीले गर्न लागेको दिनानाथ शर्माले आरोप लगाए ।
सत्तापक्षका सदस्यहरूले भने ओलीका कदमको बचाउ गरेका छन् । अधिवेशनको पहिलो बैठकमा अध्यादेशहरू पेस गर्नुपर्ने नियमावलीको व्यवस्थाअनुसार आज अध्यादेशहरू पेस हुँदैछन् ।
