१९ असार, काठमाडौं ।
नेकपा एमालेका अध्यक्ष तथा प्रधानमन्त्री केपी शर्मा ओली माओवादीका नेता कार्यकतालाई एमालेमा तान्ने अभियानमा लागेका छन् । एमाले फुटको संघारमा रहेकै बखत उनी भने माओवादीको तल्लोतहमा पकड जमाएका नेताहरुलाई एमालेमा प्रवेश गराउने अभियानमा रहेको पाइएको छ ।
पछिल्लो केही समय यता हरेक दिनजसो उनले माओवादीका जिल्ला तहमा कार्यरत नेताहरुलाई बालुवाटारमा बोलाएर छलफल गरिरहेका छन् । उनले यस कार्यमा नेता प्रदिप ज्ञवालीलाई विशेष जिम्मा सहित परिचालन गरिएको बुझिएको छ ।
आजै मात्र उनले माओवादीका पूर्व केन्द्रीय सदस्य तथा मधेश क्षेत्रमा बलियो पकड बनाएका नेता श्रीचन राय यादवसँग छलफल गरेका छन् ।
छलफलमा सहभागी एक नेताका अनुसार अध्यक्ष ओलीले माओवादीबाट एमालेमा प्रवेश गरेका सबैले उचित भूमिका पाउनेमा ढुक्कहुन आग्रह गरेका थिए । उनले नेकपा निर्माण समाजवाद स्थापनाको निम्ति पार्टी भन्दा माथी उठेर आफुले गरेको र त्यसमा पार्टी भित्रैबाट आफुलाई असहयोग भएको बताएका थिए ।
पार्टी भित्र अहिले पनि केही व्यक्तिले बखेडा झिकिरहेको बताउँदै उनले यसबाट कोही उद्धेलित हुन आवश्यक नरहेको धारणा राखेका थिए । साथै उनले एमाले जनतामा आधारित शक्ति भएकोले कसैले चाहँदैमा यो कमजोर नहुने र आउदो दशकौँसम्म देशलाई यही पार्टीले नेतृत्व गर्ने पनि बताएका थिए ।
छलफलमा नेता यादव सहित एमालेमा प्रवेश गरिसकेका नेताहरु बलकृष्ण ढुंगेल, ज्वाला साह, प्रलाद लामिछाने, कृष्ण केसी पनि सहभागी थिए ।
