२४ असार, एजेन्सी।
हाइटीका राष्ट्रपति जोभिनल मोइसको हत्यामा संलग्न भएको आशंका लागेका चार व्यक्तिको प्रहरीको गोली लागेर ज्यान गएको छ।
हाइटी प्रहरीका अनुसार बुधबार राष्ट्रपति मोइसको घरमै भएको हत्यापछि भएको खोजी अभियानको क्रममा घटनामा संलग्न भएको आशंकामा रहेका चारजनाको गोली लागेर मृत्यु भएको हो।
अरु दुईजनालाई नियन्त्रणमा लिन सफल भएको प्रहरीले जानकारी दिएको अन्तर्राष्ट्रिय सञ्चारमाध्यमले जनाएका छन्।
अझै केही सम्भावित अपराधीको खोजी जारी रहेको अधिकारीहरुले बताएका छन्। राजधानी पोर्ट–ओ–प्रिन्समा उनीहरुको खोजी भइरहेको हो।
प्रहरी प्रमुख लियोन चार्ल्सले भनेका छन्, ‘उनीहरुलाई कि नियन्त्रणमा लिइने छ, कि मारिने छन्।’
५३ वर्षका राष्ट्रपति मोइसको गोली हानी हत्या भएको हो भने उनकी श्रीमती घाइते भएकी छन्। बुधबार घरमै प्रवेश गरेर उनीहरुमाथि आक्रमणकारीले गोली प्रहार गरेका हुन्।
राष्ट्रपति मोइसको पोर्ट–ओ–प्रिन्स स्थिति निजी निवासमा आक्रमणकारीहरु स्थानीय समय अनुसार बुधबार प्रवेश गरेका थिए।
आक्रमणमा गम्भीर घाइते भएकी प्रथम महिला मार्तिनी मोइसको स्थानीय अस्पतालमा उपचारपछि अमेरिकाको फ्लोरिडा लगिएको छ। उनको त्यहाँ उपचार भइरहेको र अवस्था स्थिर रहेको जनाइएको छ।
