३१ असार, काठमाडौं ।
विवेकशील साझा पार्टीका अध्यक्ष रविन्द्र मिश्रले नेपालको राजनीतिक वजन नै हलुका भैसकेको टिप्पणी गरेका छन् । नवनियुक्त प्रधानमन्त्रीलाई छिमेकी देशका समकक्षीबाट बधाई नआएको उल्लेख गर्दै उनले सो टिप्पणी गरेका हुन् ।
पहिले नयाँ प्रधानमन्त्री नियुक्त हुँदा छिमेकी देशका समकक्षीबाट तुरुन्तै बधाई मात्र होइन भ्रमणको निम्तासमेत आउने गरेको मिश्रको भनाई छ ।
‘नयाँ प्रधानमन्त्री नियुक्त हुँदा छिमेकी देशका समकक्षीबाट तुरुन्तै बधाई मात्र होइन भ्रमणको निम्ता समेत आउँथ्यो। अब नेपाल यति हलुका बनिसक्यो कि राजदूतले ट्विटरमा या सरासर घरमा गएर बधाई दिए हुने भयो। नहोस् पनि कसरी ?’ मिश्रले भने ।
उनले निवर्तमान प्रधानमन्त्री केपी शर्मा शर्माप्रति संकेत गर्दै मध्यरातमा विदेशी गुप्तचर निकायका प्रमुख आएर थर्काएकोसम्म आरोप लगाए । ‘जुन देशका प्रधानमन्त्रीलाई विदेशी गुप्तचर निकायका प्रमुख आएर मध्यरातमा थर्काउँछन्, भुतपूर्व प्रधानमन्त्रीहरू विदेशी कुटनितिज्ञलाई भेट्न होटेलमा लाइन लागेर उभिन्छन्, नेताहरू देशमा संकट पर्यो कि दिनदाहडै विदेशी दुतावास धाउँछन्, विदेशी राजदूतहरू नेताका घरघर पुग्छन्, अन्तराष्ट्रिय कुटनीतिमा तिनको सम्मान हुनै सक्दैन।’ मिश्रले भने ।
भारतीय गुप्तचर संस्था रिसर्च एण्ड एनालाइसिस विंग (रअ) का प्रमुख सामन्तकुमार गोयलले गत ५ कात्तिकमा बुधबार बेलुकी बालुवाटार आएर ओलीलाई भेटेका थिए ।
उनले नवनियुक्त प्रधानमन्त्री शेरबहादुर देउवाको ढंग नभएको पनि आरोप लगाए । ‘जसको इज्जत हुन्छ, त्यसलाई मात्र इज्जत गरिन्छ। यी नेताले यो देशको हुर्मत यति लिए कि त्यसलाई पुनर्स्थापना गर्न हम्मेहम्मे पर्नेछ। चार पटक पहिल्यै प्रधानमन्त्री भइसकेका शेरबहादुर देउवाको त ढङ्ग छैन। अरुको के कुरा गर्नु !’ मिश्रले भने ।
नवनियुक्त प्रधानमन्त्री देउवालाई छिमेकी देश भारत र चीनबाट औपचारिक रुपमा बधाई आएको छैन ।
