७ साउन, काठमाडौँ ।
नेपाल राष्ट्र बैंकले अहिलेसम्म नेपालका सबै बैंक तथा वित्तीय संस्थाका प्रणालीहरू सुरक्षित रहेको जनाएको छ । बुधबार अपरिचित व्यक्तिबाट राष्ट्र बैंकसहित १५ वटा बैंकको सिस्टम ह्याकिङ गरी पैसा चोरी गर्ने चेतावनी आएकोमा बैंकले सर्वसाधारणलाई सुरक्षा व्यवस्थाप्रति ढुक्क हुन आग्रहसमेत गरेको छ ।
राष्ट्र बैंकका डेपुटी गभर्नर बमबहादुर मिश्रले इनिसियल सेक्युरिटी एसेसमन्ट रिपोर्टका आधारमा अहिलेसम्म सबै सिस्टम सुरक्षित रहेको दाबी गरे । उनले भनते ‘अहिलेसम्म राष्ट्र बैंकको आन्तरिक सिस्टम, आरटीजीएस, बैंक तथा वित्तीय संस्थाको कोर बैंकिङ सिस्टम, नेपाल क्लियरिङ हाउसलगायत सबै सिस्टम सुरक्षित छन् ।’
सम्भावित जोखिमबारे पनि थप अनुसन्धान भइरहेकाले ढुक्क हुन राष्ट्र बैंकले सर्वसाधारणलाई अपिल गरेको छ । उनले यसबारे प्रहरीको केन्द्रीय अनुसन्धान ब्युरोले पनि खोजी गरिरहेको बताए । ‘अहिलेसम्मको प्रारम्भिक सुरक्षा प्रतिवेदनका बैंक तथा वित्तीय संस्था र तीसँग सम्बद्ध सबै सिस्टम सुरक्षित छन् ’ उनले भने ।
बुधबार नेपाल राष्ट्र बैंकसहित १५ वटा बैंकको सिस्टम ह्याक गरी पैसा चोर्ने चेतावनी दिँदैसंस्थाका उच्च अधिकारीहरूलाई अपरिचित नम्बरबाट फोन र इमेल आएको थियो ।
