७ साउन, काठमाडौं ।
नेपाली क्रिकेट टोलीका स्पिनर सन्दीप लामिछानेले बिहिबार नेपाल आइपुगेका छन् । भिसाको कारण इंग्ल्यान्ड तथा वेल्स क्रिकेट बोर्डको आयोजनामा हुने द हन्ड्रेड (एक सय बलको) प्रतियोगिता गुमाउने भएपछि सन्दीप आज दिउँसो १२ बजे नेपाल आइपुगेका हुन् ।
उनी गत असार २४ मा इंग्ल्यान्ड गएका थिए । सन्दीपको म्यानेजर रमन शिवाकोटीले त्रिभुवन विमान स्थल दिउँसो १२ बजे आइपुगेको जानकारी दिएका छन् । सन्दीप युके पुगेको टिएर ५ भिसामा द हन्ड्रेड खेल्न नपाउने भएपछि सन्दीप स्वदेश फर्किका हुन् । बिहिबारदेखि सुरु हुने प्रतियोगितामा सन्दीप ओभल इन्भिन्सिबल्समा अनुबन्ध भएका थिए । सन्दीप द हन्ड्रेडमा ६० हजार पाउण्डमा अनुबन्ध भएका थिए । सन्दीपले भिसा प्रक्रियामा ढिला भएकै कारण अघिल्लो महिना टि२० ब्लास्ट गुमाएका थिए ।
सन्दीपले सोमबार बेलायत सरकारबाट मान्यता प्राप्त होटेलमा १० दिनको क्वारेनटाइन समय गरेका थिए । सन्दीपको टोलीले उद्धघाटन खेलमा म्यानचेस्टर ओरिजिनल्ससँग खेल्ने कार्यक्रम थियो । सन्दीप प्रतियोगिता पूर्ण रुपमा प्रतियोगिताबाट बाहिर हुने भएपछि उनको स्थानमा दक्षिण अफ्रिका स्पिनर तबरेज शाम्सी खेल्ने छन् ।
