७ साउन, काठमाडौँ ।
नेकपा (एमाले) अध्यक्ष केपी शर्मा ओलीले बाटो बिराएका नेताहरुलाई ‘आममाफी’ दिने घोषणा गरेका छन् । ४३ औं पुष्पलाल स्मृति दिवसको अवसर पारेर बिहीबार ललितपुरमा आयोजित एक कार्यक्रममा बोल्दै उनले पार्टी भित्र बाटो विराएकाहरुलाई मिलेर काम गर्न आग्रह गरे ।
नेकपा एमालेको ओली पक्षले प्रधानमन्त्री शेरबहादुर देउवालाई विश्वासको मत दिएका सांसदहरुलाई स्पष्टिकरण सोधेको थियो । स्पष्टिकरणबारे माधव नेपाल पक्षका सांसदहरुले जवाफ दिनु अघि नै पार्टी अध्यक्ष ओलीले एकताका लागि सबैैलाई कारवाही नगरी माफी दिने बताएका हुन् ।
उनले भने, “आउनोस् मिलेर काम गरौं । यस आन्दोलनलाई मजबुद पारौं । सबैलाई आग्रह गर्न चाहन्छु– एकजुट भएर जाऔं । यस पार्टीको एकताका लागि पुष्पलाललाई सम्झिएर भन्न चाहन्छु–‘एम्नेष्टि इज ग्रान्टेड’ । पदका कुरा छाडिदिउँ । स्वार्थका कुरा छाडिदिउँ । देशका कुरा गरौं, जनताका कुरा गरौं । समस्या समाधानका कुरा गरौं । पार्टीको एकताका कुरा गरौं । समस्या समाधानका कुरा गरौं । बाटो विराएका, भडकिएका साथीहरुलाई म आग्रह गर्न चाहन्छु ।”
अध्यक्ष ओलीले आफू नेतृत्वको सरकारलाई सारा शक्ति लागेर पनि हटाउन नसकेपछि परमादेशको सहारामा लिएर हटाएको दावी समेत गरे । उनले भने,“दुनियाँ लागेर हटाउन नसकेपछि परमादेशबाट हटाईयो । जनादेशबाट होइन, परमादेशबाट हटाइपनि आफ्नो पार्टी देशको सबैभन्दा ठूलो शक्ति हो । संसदमा, प्रदेशमा र स्थानीय तह सबैैमा आफ्नो पार्टी प्रमुख राजनीतिक शक्ति भएकाले देशको समृद्धिका लागि नयाँ विचार दिँईनै रहनेछ ।”
अध्यक्ष ओलीले पुष्पलाल, मदन भण्डारी र मनमोहन अधिकारी जस्ता नेताहरुको मार्गदर्शनमा आफ्नो पार्टी अघि बढिरहने प्रतिवद्धता समेत व्यक्त गरे ।
