८ साउन, काठमाडौं ।
राष्ट्रिय प्रजातन्त्र पार्टी(राप्रपा) र नेपाल कम्युनिस्ट पार्टी(नेकपा) का महासचिव नेत्रविक्रम चन्द ‘विप्लव’बीच भेटवार्ता भएको छ। शुक्रबार राप्रपा अध्यक्ष कमल थापा निवास बूढानीलकण्ठमा ‘विप्लव’सहितका नेता र राप्रपाका नेताहरुबीच छलफल भएको हो।
दुई पार्टीका नेताहरुबीच समसामयिक विषयमा विचार विमर्श भएको अध्यक्ष थापाले जानकारी दिए। विप्लव नेतृत्वको माओवादीसँग सरकारले गरेको ३ बुँदे सहमति कार्यान्वयन हुनुपर्छ भन्ने राप्रपाको धारणा रहेको थापाले बताए।
विप्लव नेतृत्वको नेकपाले पछिल्ला दिनहरुमा दलका नेताहरुसँग भेटघाट गर्दै सरकारसँग भएको तीन बुँदे सहमति कार्यन्वयनमा जोड दिइरहेको छ।
वार्तामा उनीहरु अहिलेको संसदीय व्यवस्था असफल सिद्ध भएको भन्दै विवादित विषयमा जनमत सङ्ग्रहमा गइनुपर्नेमा सहमत भएका छन् । राप्रपाले सङ्घीयता, धर्मनिरपेक्षता, राजतन्त्रलगायतका विषयमा जनमत सङ्ग्रहको माग गर्दै आएको छ । त्यस्तै विप्लवले पनि वैधानिक समाजवादका लागि जनमत सङ्ग्रहमा जानुपर्ने बताउँदै आएका छन् ।
