८ साउन, काठमाडौँ ।
नेपालीकांग्रेसका सभापति शेरबहादुर देउवाले पार्टीको क्रियाशील सदस्यता छानवीन निष्पक्ष ढंगले गर्न दवाव स्वरुप अनसन बस्दै आएका पार्टीका नेता, कार्यकर्ताको माग तत्काल सुनुवाई गर्न क्रियाशील सदस्यता छानवीन समितिलाई निर्देशन दिएका छन् । बुढानिलकण्ठस्थित आफ्नै निवासमा शुक्रबार बसेको पार्टीको पदाधिकारी तथा पूर्व पदाधिकारी बैठकमा प्रधानमन्त्री समेत रहेका सभापति देउवाले धाँधलीरहित ढंगले पार्टीको क्रियाशील सदस्यता छानविन गर्न दवाव दिँदैै पार्टी केन्द्रिय कार्यालय सानेपामा धर्ना दिँदै आएका नेता, कार्यकर्ताहरुको माग शुक्रबार दिनभरमा सुुनुवाई गरी शनिबार बिहान बस्ने पदाधिकारी बैठकमा पेश गर्न छानविन समितिलाई सचेत गराएका हुन् ।
निष्पक्ष ढंगले पार्टीको क्रियाशील सदस्यता छानवीनबारे माग राख्दै पार्टी कार्यालयमा धर्ना दिँदै आउनु भएका नेता, कार्यकर्ताहरुको माग शुक्रबार दिनभर सुनुवाई गरी शनिबार विहान पुन बस्ने पदाधिकारी बैैठकमा पेश गर्न सभापति देउवाले छानविन समितिलाई निर्देशन दिएको पार्टीका प्रवक्ता विश्वप्रकाश शर्माले जानकारी दिए । उनले बैठकपछि सञ्चारकर्मीसँग संक्षिप्त प्रतिक्रिया दिँदै भने , “सभापतिजीले निर्देशन दिनु भएको छ– पार्टीको क्रियाशील सदस्यताको विषयलाई लिएर जो पार्टी कार्यालयमा अनसन बस्दै आउनु भएका छ, उहाँहरुको मागको सुनुवाई आजैै गरी भोली बस्ने बैठकमा पेश गर्नु ।”
नेपाली कांग्रेसको पदाधिकारी बैठकले शनिबार विहाननौं बजे सभापति देउवाको निवास बुढानिलाकण्ठमै बस्नेछ । बैठकले क्रियाशील सदस्यता वितरणका सम्बन्धमा देखिएको समस्या पार्टी केन्द्रिय कार्य समितिले मात्रै टुंगो लगाउने पनि स्पष्ट पारेको छ ।
बैठकमा क्रियाशील सदस्यता छानविन समितिका संयोजक रमेश लेखकले साउन १० गते आईतबार आफ्नो समितिको प्रतिवेदन पार्टीलाई बुझाउने तयारी गरिएको जानकारी समेत गराएका थिए । कांग्रेसले शनिबार विहान बोलाउने पदाधिकारी बैठकमा आसन्न १४ औं महाधिवेशनका लागि साउन १२ गतेदेखि सुरु गर्ने भनिएको पार्टीको तल्लो तहको अधिवेशन सार्ने गरी मिति तय गर्ने पनि जनाएको छ ।
क्रियाशील सदस्यता छानविन समितिको प्रतिवेदन समेत नआएकाले सो सम्बन्धि मिति तय गर्ने विषयमा पनि भोली बोलाइएको पदाधिकारी बैठकमा छलफल हुने निर्णय गरिएको प्रवक्ता शर्माले बताए ।
