९ साउन, काठमाडौं ।
युथ फोर्स भ्याली कमाण्ड घोषणासभामा प्रमुख अतिथीको रुपमा डाँकिएका एमाले अध्यक्ष केपी शर्मा ओली अन्तिम समयमा रोकिएका छन् । नेकपा एमालेको आन्तरिक एकता कायम गर्न सक्रिय रहेका नेताहरुले घोषणासभामा नजान आग्रह गरेपछि ओली अन्तिम समयमा रोकिएका हुन् ।
कार्य व्यस्तताका कारण प्रमुख अतिथी पार्टी अध्यक्ष ओलीले उपस्थित हुन नसकेको भनेपछि महासचिव ईश्वर पोखरेललाई प्रमुख अतिथी बनाएर कार्की पार्टी प्यालेसमा युथफोर्सको घोषणा हुँदैछ ।
एमाले निकट स्रोतले भने अध्यक्ष ओलीलाई वार्ता प्रक्रियामा रहेका नेताहरुले माधव नेपालसँग भेटघाटको वातावरण बनाइरहेको र एकता प्रक्रियामा असर नपरोस भनेर सो कार्यक्रममा उपस्थित नहुन आग्रह गरेको बताएको छ ।
यसअघि घोषणा कार्यक्रममा ओली आउने भन्दै प्रचार गरिएका थियो। यालीका लागि बनाइएको ब्यानरमा ओलीको फोटो राखेर प्रचार गरिएको थियो।
एमालेका दुवै पक्षमा पछिल्लो समय बाहुबली संगठनको घोषणामा प्रतिष्पर्धा जस्तै चलेको छ । संस्थापन पक्षले युथफोर्स ब्युँताएपछि माधवकुमार नेपाल पक्षले अखिल फोर्स बनाएको थियो । बिहीबार मात्रै नेपाल पक्षले नै पिपुल्स भोलेन्टियरको घोषणा गरेको थियो । भक्तपुरमा नेता नेपालकै उपस्थितिमा हजार जानाको पिपुल्स भोलेन्टियर घोषणा भएको थियो ।
पार्टी भित्रको विवाद चर्किदै जाँदा एकअर्काको काउन्टरमा घोषणा भइरहेका यस्ता बाहुबली संगठनको घोषणाले बन्न लागेको सहमतिको वातावरण समेत बन्ने चिन्ता नेताहरुले गरेका छन् ।
एमाले नेता योगेश भट्टराईले अखिल र युवासंघ जस्ता संगठनलाई ओझेलमा पारेर गठन गरिएका यस्ता फोर्सको औचित्य नहुने बताएका छन् ।
