११ साउन, एजेन्सी ।
विश्व खेलकुदको कुम्भमेला ३२औं संस्करणको ग्रीष्मकालीन ओलम्पिक (टोकियो ओलम्पिक–२०२०)को तेस्रो दिन आज विभिन्न १४ खेलमा २१ स्वर्ण पदकको भिडन्त हुँदैछ । आज पौडीमा सबैभन्दा बढी ४ स्वर्ण पदकको छिनोफानो हुनेछ ।
यसैगरी तेक्वान्दो, जुडो, फेन्सीङ र सुटिङमा दुई दुई वटा स्वर्ण पदकको भिडन्त हुनेछ । आर्चरी, जिम्न्याष्टीक, क्यानो स्लालोम, साईक्लीङ, डाइभिङ, स्केटबोर्डीङ, टेबल टेनिस, ट्राएथ्लन र भारत्तोलनमा एक एक वटा स्वर्ण पदकको टुंगो आज लाग्नेछ ।
दोस्रो दिनको खेल सकिदासम्म चीनले ६ स्वर्ण र एक रजत र ४ कास्यसहित ११ पदक प्राप्त गर्दै शीर्षस्थान ओगटेको छ । चीनले पहिलो दिन ३ स्वर्ण र एक कास्य जितेको थियो । चीनलाई आयोजक जापानले पछ्याइरहेको छ । जापानले दोस्रो लिनको खेल सकिदासम्म ५ स्वर्ण र १ रजतसहित कुल ६ पदक जितेका छन् । अमेरिकाले ४ स्वर्ण, २ रजत र ४ कास्यगरी कुल १० पदक जित्दै तेस्रो स्थान ओगटेको छ ।
दक्षिण कोरियाले २ स्वर्ण र ३ कास्यगरी कुल ५ पदक हात पार्दै चौथो स्थानमा रहेको छ । रसियन खेलाडीको टोली (आरओसी), इटाली, अष्ट्रेलिया, फ्रान्स, हंगेरी, ट्युनिसिया, अष्ट्रिया, इक्वेडर, इरान, कोसोभो, नर्वे, थाइल्यान्ड र उज्वेकिस्तानले समान १–१ स्वर्ण जितेका छन् । टोकियो ओलम्पिकमा २०५ राष्ट्र र शरणार्थी टोली गरेर हालसम्म ४२ राष्ट्रले पदक जित्न सफल भएका छन् ।
