११ साउन, एजेन्सी ।
पोर्चुगिज सुपरस्टार फरवार्ड क्रिस्टियानो रोनाल्डो इटालियन महारथी युभेन्ट्सको प्रशिक्षणमा फर्किएका छन् । उनी सोमबारदेखि युभेन्ट्सको प्रशिक्षणमा जोडिएका हुन् । उनको सरुवाबारे अनेक चर्चा चलेपनि उनी झन्डै एक महिनाको छुट्टी बिताएर क्लबमा जोडिएका हुन् ।
युरोकप २०२० का कारण ३६ वर्षीय रोनाल्डो युभेन्ट्सको प्रि सिजनमा आउन ढिलाई भएको थियो । अधिकांश स्टार खेलाडीहरु अझै पनि छुट्टीमै रहेका छन् । रोनाल्डोको कप्तानीमा रहेको पोर्चुगल प्रि–क्वाटरफाइनलमा बेल्जियमसँग १–० ले पराजित हुदै युरोबाट बाहिरिरएको थियो ।
यो अवधिमा पाँच पटकको बालोन डि ओर विजेता रोनाल्डोको गन्तव्यबारे थुप्रै रुमर्सहरु आएको थियो । सोमबार क्लबको प्रशिक्षणमा जोडिएसँगै उनी यो सिजनसम्म युभेन्ट्समै रहने अनुमान गर्न सकिन्छ । रोनाल्डोलाई फ्रान्सेली क्लब पेरिस सेन्ट जर्मेन (पीएसजी) र इंग्लिस क्लब म्यानचेस्टर युनाइटेडले विशेष चासो देखाएको थियो ।
रोनाल्डो आइतबार साँझ नै टुरिन पुगेका थिए । उनीमात्रै होइन डच डिफेन्डर म्याथ्थिज डि लेग्ट, फ्रेन्च मिडफिल्डर एड्रिएन राविओट र स्विडिस फरवार्ड डिजान कुलुसेभ्स्की पनि युभेन्ट्सको प्रशिक्षणमा फर्किएका छन् ।
रोनाल्डो सोमबार युभेन्ट्सको टोलीको प्रशिक्षणमा सामेल हुदा उनी आकर्षणको केन्द्र बनेको थियो । युभेन्ट्सको प्रशिक्षण स्थल विनोभोमा उनले समर्थकसँग तस्विरमा रम्दै अटोग्राफ समेत दिएका थिए । उनी युभेन्ट्समा सम्झौताको अन्तिम सिजनमा रहेको छ । सम्झौता नविकरणको लागि पनि उनलाई खुला छ ।
२०१८ मा स्पेनिस क्लब रियल म्याड्रिड छाड्दै युभेन्ट्स पुगेका रोनाल्डोले ३ सिजनमा १३३ खेलमा १०१ गोल गरेका छन् । दुई सिरी ‘ए’ को उपाधि पनि जितेका छन् ।
