१३ साउन, काठमाडौं ।
पूर्वमन्त्री एवं नेकपा (माओवादी केन्द्र)बाट एमालेमा प्रवेश गरेका नेता टोपबहादुर रायमाझीले आफू अझै माओवादीमै रहेको बताएका छन् । बुधबार सर्वोच्च अदालतमा सांसद् पदको पुनर्बहालीको माग गर्दै दायर गरेको रिटमा रायमाझीले आफूले औपचारिक रुपमा एमाले प्रवेश नगरेको बताएका हुन् ।
उनले रिट निवेदनमा उल्लेख गरेका छन्, ‘केपी शर्मा ओली अध्यक्ष रहेको नेकपा (एमाले)मा आजसम्म म निवेदक औपचारिक रुपमा प्रवेश गरेको छैन, एमाले पार्टीको सदस्यता लिएको छैन । मिति २०७८ असार २३ गते मैले निर्वाचन आयोगबाट निवदेन गरी निकालेको प्रतिलिपिअनुसार नेकपा एमाले केन्द्रीय कमिटीको सदस्यमा म छैन ।’
माओवादी पार्टीले कारबाही गर्दा आफूलाई स्पष्टिकरण नसोधेको उल्लेख गर्दै रायमाझीले आफूलाई स्पष्टिकरणको मौका नदिइएको रिट निवदेनमा बताएका छन् ।
उनीसँगै माओबादी छोडेर एमालेमा प्रवेश गरेका लेखराज भट्ट, गौरीशंकर चौधरी र प्रभु शाहले पनि सांसद् पदको पनुर्बहालीको माग गर्दै बुधबार रिट निवदेन पेश गरेका छन् ।
