१३ साउन, विराटनगर ।
मेरङको सुन्दरहरैंचा नगरपालिका १० त्रिवेणी चोकस्थित शिव पञ्चायन ज्वेलर्समा हतियार देखाइ लुटपाट गर्न खोज्ने ६ जनालाई पक्राउ गरेको छ । लुटपाटको प्रयास गर्ने समूहलाई प्रहरीले मंगलबार राति अत्याधुनिक हतियारसहित पक्राउ गरेको हो ।
प्रहरीले उनीहरुको साथबाट एसएमजी र त्यसमा लाग्ने म्याग्जिन र ६२ राउण्ड गोली, कटुवा पेस्तोल र थ्री नट थ्री राइफलमा प्रयोग हुने ३ राउण्ड गोली र अटोमेटिक पेस्तोल, त्यसमा लाग्ने म्याग्जिन र २ राउण्ड गोली समेत बरामद गरेको मोरङका एसपी जनार्दन जिसीले पत्रकार सम्मेलनमार्फत जानकारी दिए ।
पक्राउ पर्नेहरुमा संखुवासभाको सभापोखरी गाउँपालिका ४ घर भइ हाल इटहरी उपमहानगरपालिका २० तरहरा बस्ने ३९ वर्षीय प्रकाश भन्ने चन्द्रबहादुर राई, सुनसरीको गढी गाउँपालिका १ बस्ने ४५ वर्षीय डायमण्ड भन्ने प्रमोद चौधरी, संखुवासभाको सभापोखरी ६ बाह्रबीसे घर भइ इटहरी २० तरहरमा डेरा गरी बस्दै आएका ३० वर्षीय चिरञ्जिवी राई, सुन्दरहरैंचा–५ का २२ वर्षीय मिसन राई, भोजपुरको पौवादुम्बा गाउँपालिका(३ घर भइ इटहरी २० तरहरामा डेरा गरी बस्दै आएका ३० वर्षीय नगेन्द्र राई र सुन्दरहरैंचा(७ का ३१ वर्षीय सन्तोष राई छन् ।
प्रहरीले उनीहरुले प्रयोग गरेको प्रदेश १–०२–०४४प ५९९५, को २० प १८६, को ८ प ६५८३, को २१ प ६७०३ नम्बरको मोटरसाइकल, को २ ह २७३६ नम्बरको अटो रिक्सा, ६ थान मोबाइल, एमआरपी लेखिएको सञ्चार सेट दुई थान र १६ हजार ५ सय नगद पनि बरामद गरेको जनाएको छ ।
लुटपाटमा गर्न जानेमध्ये एक जना अझै फरार रहेकाले खोजी भइरहेको प्रहरीले जनाएको छ । गत साउन १ गते दिउँसो १ बजे चन्द्रबहादुर र प्रमोदले योजनाबद्ध रुपमा थापाको पसलमा लुटपाटको असफल प्रयास गरेका थिए । लुटपाट गर्ने योजनासहित उनीहरुले केही दिनदेखि सुराकी गरिरहेको जिसीले बताए । ‘उनीहरुले सुरुमा बरामद भएको अटो रिक्सा प्रयोग गरेर २–३ दिन अगाडिदेखि पसल तथा त्यसको वरिपरि सुराकी गरेका थिए,’ जिसीले भने, ‘त्यसपछि साउन १ गते ३ वटा मोटरसाइकलमा ६ जना आएर सुन पसलमा लुटपाट गर्न खोजेका थिए ।’
प्रहरीका अनुसार चन्द्रबहादुरले एसएमजी, चौधरीले कटुवा पेस्तोल र पक्राउ पर्न बाँकी रहेका एक जनाले अटोमेटिक पेस्तोल बोकेर पसलभित्र प्रवेश गरेका थिए । अन्य ४ जनाले पसल बाहिर सुरक्षा घेरा बनाएका थिए । लुटपाटका लागि तीनै जना सुन पसलभित्र प्रवेश गरेर सटर लगाएर हतियार देखाएपछि पसल सञ्चालक थापाकी पत्नीले घर बाहिर निस्केर होहल्ला गरेकी थिइन् । त्यसपछि टोलका मानिसहरुले पनि होहल्ला गर्दै जम्मा हुन थालेपछि उनीहरुको लुटपाट योजना असफल भएको थियो । पसलबाट बाहिर निस्कने क्रममा उनीहरुले एसएमजी फायर गर्न खोजे पनि फायर नभएपछि भागेका थिए ।
उनीहरुविरुद्ध हातहतियार खरखजाना, डाँका, संगठित अपराध र गोली चलाउने प्रयास मुद्दा दर्ता गरेर अनुसन्धान अघि बढाइएको प्रहरीले जनाएको छ ।
