काठमाडौं : युवतीलाईं जबरजस्ती करणी गरेको आरोपमा ट्राफिक प्रहरी कार्यालय झापा विर्तामोडमा कार्यरत प्रहरी असई पक्राउ परेका छन्। जिल्ला ट्राफिक प्रहरी कार्यालय विर्तामोड झापामा कार्यरत असई जितेन्द्र मण्डल पक्राउ परेका हुन्।
सप्तरी बोदेबसाइन वडा नं. १ का ३९ वर्षीय मण्डलले २३ वर्षीया युवतीलाई बिवाह गर्ने बहानामा पटक पटक जबरजस्ती करणी गरेको उजुरी इलाका प्रहरी कार्यालय इटहरीमा परेको थियो। इलाका प्रहरी कार्यालय इटहरीले मण्डललाई उपस्थित गराउन पत्रचार गरेलगत्तै उनी आफै आएको इटहरीका डिएसपी अर्जुन केसीले बताए।
युवतीले पछिल्लो पटक चैत २८ गते रातको समयमा मण्डलले इटहरीमा जबरजस्ती करणी गरेको उजुरी साउन ९ गते इटहरीमा दर्ता गरेकी थिइन्। मण्डललाई जिल्ला अदालत सुनसरीबाट जर्वरजस्ती करणीमा मुद्दा दर्ता गरेर अनुसन्धान थालिएको छ। आफन्त, शिक्षित, देशका रक्षक एवं गाउँघरका भलादमीबाटै जर्वरजस्ती करणीका घटना घटने क्रम बढ्दो छ।
जबरजस्ती करणी गर्ने हरेकले फरकफरक शैली अपनाउने गरेको विभिन्न घटनाले देखाएको छ। कतिपयले नसालु पदार्थ खुवाएर त कतिपयले ललाई फकाई प्रलोभनमा पारेर गर्ने गरेका छन्। डर, त्रास, धाक–धम्की, अनुचित प्रभाव, शरीर बन्धक राखेर वा होस् नभएको अवस्थामा कोही महिलामाथि जबरजस्ती गरिन्छ भने त्यसलाई नै जबरजस्ती करणी मानिन्छ।, यो समाचार नागरिक दैनिकमा छापिएको छ ।
