१४ साउन, काठमाडौँ ।
नेपाली राष्ट्रिय फुटबल टोलीका मुख्य प्रशिक्षक अब्दुल्ला अलमुताइरीले अखिल नेपाल फुटबल संघ (एन्फा)का वरिष्ठ उपाध्यक्ष पंकजविक्रम नेम्बाङसहित दुई सञ्चारकर्मीका विषयमा छानबिन गर्न माग गरेका छन् । उनले छानबिनको माग गर्दै एन्फामा बिहीबार पत्र बुझाएका हुन् ।
उपाध्यक्ष नेम्बाङसहित एउटा खेलकुद अनलाइनका दुई सञ्चारकर्मीका विषयमा छानबिन गर्न अलमुताइरीले पत्र दर्ता गराएको एन्फा प्रवक्ता किरण राईले जानकारी दिए । शुक्रबार आफूसँग दुई सञ्चारकर्मीबीच भएको विवादमा वरिष्ठ उपाध्यक्ष नेम्बाङको भूमिका रहेको अलमुताइरीले बताएका छन् ।
अलमुताइरीले आइतबार सामाजिक सञ्जालमा समर्थकलाई सम्बोधन गर्दै एन्फाका वरिष्ठ उपाध्यक्ष पंकजविक्रम नेम्बाङका कारण आफूले राजीनामा दिन लागेको घोषणा गरेका थिए । यद्दपी उनले हालसम्म लिखित राजीनामा भने दिएका छैनन् ।
अर्कोतर्फ नेम्बाङले भने एन्फाको आउने निर्वाचनलाई प्रभावित गर्नेगरि आफूमाथि आरोप लगाएको बताएका थिए । उनले अलमुताइरीको आरोपका सत्यता नभएको उल्लेख गर्दै छानबिनका लागि एन्फा केन्द्रिय समितिको बैठक माग गरेका छन् । एन्फाले शुक्रबारका लागि केन्द्रिय समितिको आपकालीन बैठक बोलाएको छ ।
विवादका दुवै पक्षले छानबिनको माग गरेपछि घटनाक्रमले नयाँ मोड लिएको छ ।
