१९ साउन, काठमाडौँ ।
राष्ट्रिय खेलकुद परिषद् (राखेप)ले फुटबलको पछिल्लो विवादका विषयमा छानबिन गर्न कार्यवहाक सदस्य सचिव पुरेन्द्रविक्रम लाखेको संयोजकत्वमा ७ सदस्यीय समिति गठन गरेको छ । राखेपले मंगलबार गठन गरेको समितिमा राखेप सदस्य सुवर्ण श्रेष्ठ, चन्द्रबन्दना राई, रेनुका श्रेष्ठ, राखेप प्रशिक्षण विभाग प्रमुख अर्जुन बिक, कानुन शाखाका नारायण अर्याल र संघ संस्थाका सरोज पोखरेल रहेका छन् ।
एन्फाका वरिष्ठ उपाध्यक्ष पंकजविक्रम नेम्बाङ, राष्ट्रिय फुटबल टोलीका प्रशिक्षक अब्दुल्ला अलमुताइरी र दुई सञ्चारकर्मीको विवादका विषयमा छानबिन गर्न एन्फाले युवा तथा खेलकुद मन्त्रालयलाई अनुरोध गरेको थियो । मन्त्रालयले सो जिम्मेवारी राखेपलाई दिएपछि समिति गठन गरेको हो ।
छानबिनका लागि मन्त्रालयबाट सोमबार नै पत्र प्राप्त भएकोले प्रक्रिया अघि बढाइएको कार्यवाह सदस्य सचिव कुवँरले बताए । समितिलाई छानबिनका लागि ७ दिनको समय तोकिएको छ ।
अलमुताइरी र दुई सञ्चारकर्मीसँगको विवादबाट अहिले एन्फामा उग्र रुप लिएको छ । शुक्रबार बसकेको एन्फा केन्द्रिय समितिको आपतकालिन बैठकले मन्त्रालयलाई छानबिनका लागि अनुरोध गर्ने निर्णय गरेको थियो । एन्फाले अर्को निर्णय नभएसम्मका लागि अलमुताइरीलाई राष्ट्रिय टोलीको प्रशिक्षणबाट रोक लगाएको छ ।
