२२ साउन, काठमाडौँ ।
ललितपुरस्थित तुल्सीलाल स्मृति प्रतिष्ठानमा नेकपा एमालेको स्थायी समिति बैठक जारी छ । बैठकले पार्टीको विधान संशोधन गर्ने तथा दशौँ महाधिवशेनबारे छलफल गर्ने बुझिएको छ ।
यसवाहेक माधव नेपाल पक्षका नेताहरुमाथि कारवाही गर्न सकिने समेत अध्यक्ष केपी ओली निकट एक नेताले जानकारी दिए ।
शुक्रबारको बैठकले धेरै विषयको छिनोफानो गर्नसक्ने ओली निकट स्रोतले बताएको छ । माधव नेपाल समूहको केन्द्रीय कमिटी र स्थायी समिति बैठक बसिरहँदा अध्यक्ष ओलीले आफू निकट स्थायी समिति बैठक सुरु गरेका हुन् ।
नेपाल समूहका नेताहरुले भने आफूहरु अझै पनि एकताकै पक्षमा रहेको प्रतिक्रिया दिँदैआएका छन् । उनीहरुले सम्मानजनक एकता हुनुपर्ने धारणा राखेका छन् ।
अध्यक्ष केपी ओली पक्षले यसअघिको बैठकबाट असोजको पहिलो साताभित्र स्थानीय तहका अधिवेशन सम्पन्न गरिसक्न निर्देशन दिएको थियो। तर वडा र नगर कमिटीको अधिवेशन रोकेर एकताका लागि पहल गर्न नेपाल पक्षको माग छ।
एमालेले भदौ २७ र २८ गते विधान महाधिवेशन तोकेको छ। ३ असोजमा वडा र ९ असोजमा स्थानीय तहको अधिवेशन गर्ने निर्णय निर्णय गरेको छ।
