२८ साउन, काठमाडौं ।
पूर्वगृहमन्त्री एवम् नेकपा एमालेका सांसद् खगराज अधिकारीले अफगानिस्तानमा युद्धका कारण फसेका नेपालीको तत्काल सुरक्षित रूपमा उद्धार गर्न सरकारसँग माग गरेका छन् ।
बिहीबार प्रतिनिधिसभाको शून्य समयमा बोल्दै अधिकारीले नेपालीको उद्धार नगरेसम्म सरकारलाई सदनमा काम गर्न नदिने चेतावनी दिए ।
उनले भने ‘अफगानिस्तानमा नेपालीहरू आर्तनाद गरिरहेका छन्, ती नेपालीहरूलाई ल्याउने काम यो सरकारले गर्छ कि गर्दैन ? नेपालीको जीउज्यानको सुरक्षा गर्न सक्छ कि सक्दैन ? तुरुन्त नेपालीहरूलाई अफगानीस्तानबाट रेस्क्यू गरेर ल्याउने काम गरोस् होइन भने यो सरकार नालायक छ भनेर हामी यो संसदमा भन्छौं ।’
उनले थपे, ‘र सरकारलाई काम गर्न दिँदैनौं। नेपाली नफर्काएसम्म सरकारले संसदमा काम गर्न सक्ने छैन । उनीहरूलाई अविलम्ब नेपालमा सुरक्षित अवतरण गराओस् ।’
अफगानिस्तानमा तालिवान विद्रोहीले अहिलेसम्म ३४ मध्ये नौवटा प्रान्तलाई कब्जामा लिएका छन् । हिंसा भड्काइरहेका छन्। त्यहाँ नेपालीहरू पनि फसेको अनुमान गरिएको छ ।
अन्य देशले त्यहाँ फसेका आफ्ना नागरिकको उद्धार शुरू गरेका छन् ।
