१ भदाै, एजेन्सी ।
अन्तिम दिन उत्कृष्ट प्रदर्शनका साथ भारतले दोस्रो टेस्ट खेलमा इंग्ल्यान्डमाथि १ सय ५१ रनको सानदार जित निकालेको छ । साेमबार फराकिलो जितसँगै पाँच टेस्ट खेलमा भ्रमण टोली भारतले १-० को अग्रता लिएको छ ।
लर्ड्स क्रिकेट मैदानमा जितको लागि २ सय ७२ रनको विजयी लक्ष्य पछ्याएको इंग्ल्यान्ड दोस्रो इनिङमा ५१.५ ओभरमा १ सय २० रनमा अल आउट भएपछि फराकिलो हार बेहोरेको हो ।
इंग्ल्यान्डका कप्तान जो रुटले ६० बलमा ५ चौका सहित सर्वाधिक ३३ रनको योगदान दिए । जस बटलरले ९६ बलमा ३ चौका सहित २५ र मोईन अलीले १३ रन जोडे । अन्य कुनैपनि ब्याट्सम्यानले दोहोरो अंकमा रन बनाउन सकेनन् । पहिलो इनिङमा २७ रनले अग्रता लिएको इंग्ल्यान्ड चौथो दिन सम्म बलियो अवस्थामा थियो । तर पाँचौं दिन ब्याटिङ र बलिङ दुबै नचल्दा पराजित हुन पुगेको थियो ।
इंग्ल्यान्डका दुबै ओपनर रोरी बन्र्स र डोम सिब्ले खाता नखोली आउट भएका थिए । पहिलो ओभरमै जस्प्रित बुमराहले बन्र्सलाई मोहम्मद शिराजबाट शून्यमा क्याच गराए । मोहम्मद शामीको अर्को ओभरको चौथो बलमा सिब्ले पनि पन्तबाट शून्यमा आउट भए ।
ईशान्तले हसिब हमिदलाई ९ रनमा क्याच गराए । ईशान्तले २२ औं ओभरमा जोनी बेयरस्टोलाई दुई रनमा एलबिडब्लू आउट गरेपछि इंग्ल्यान्ड दबाबमा परेको थियो । बराबरीमा रोक्ने इंग्ल्यान्डलाई राम्रो अवसर थियो । अर्को ओभरमा बुमराहले रुटलाई विराट कोहलीबाट क्याच गराएपछि इंग्ल्यान्ड समस्यामा परेको थियो । शिराजले मोईन अली र साम करनलाई लगातार आउट गरेपछि भारत जिततर्फ अघि बढेको थियो ।
करन दुबै खेलमा गोल्डेन डक आउट भए । मार्क वुड र जेम्श एन्डरसन दुबैले खाता खोल्न सकेनन् । समग्रमा इंग्ल्यान्डका आठ खेलाडीले दोहोरो अंकमा रन बनाउन सकेनन् । जसमा पाँच खेलाडी शून्यमा आाउट भए । भारतका मोहम्मद शिराजले सर्वाधिक चार विकेट लिए । बुमराहले तीन, ईशान्त शर्माले दुई मोहम्मद शामीले एक विकेट लिए ।
त्यसअघि दोस्रो इनिङमा भारतले पाँचौं दिन दोस्रो सेसनमा १०९.३ ओभरमा ८ विकेटको क्षतिमा २ सय ९८ रन बनाउँदै अवस्थामा इनिङ समाप्तिको घोषणा गरेको थियो। नवौं विकेटका लागि शामी र बुमराहले १ सय २० बलमा ८९ रनको अविजित साझेदारी गरेपछि भारतले बलियो योगफल तयार पारेको थियो । शामी ७० बलमा ६ चौका र १ छक्का सहित ५४ रनमा अविजित रहे ।
बुमराह ६४ बलमा ३ चौका सहित ३४ रनमा अविजित रहे । टेस्टमा यी दुबै खेलाडीको करीअरकै उच्च प्रर्दशन हो । दशौं ओभरको दोस्रो बलमा तीव्र गतिका बलर मार्क वुडले ओपनर लोकेश राहुललाई विकेटकिपर जस बटलरबाट पाँच रनमा क्याच गराउँदै पहिलो सफलता दिलाए । मार्क वुडकोनै १२ औं ओभरको अन्तिम बलमा रोहित शर्मा मोईन अलीबाट २१ रनमा क्याच आउट हुन पुगे ।
२४ औं ओभरको पहिलो बलमा युवा बलर साम करनले भारतका कप्तान विराट कोहलीलाई २० रनमा बटलरबाट क्याच गराउँदै सर्वाधिक ठूलो सफलता दिलाएका थिए । विराट एज लागेर आउट हुँदा भारत ५५–३ को कमजोर अवस्थामा पुगेको थियो । कोहलीले ३१ बलमा चार चौका प्रहार गरे । कमजोर सुरुवात गरेको भारतलाई चौथो विकेटका लागि अजिंक्या रहाणे र चेतेश्वर पुजाराले २ सय ९७ बलमा एक सय रनको साझेदारी टोलीको संकट टारेका थिए ।
मार्क वुडले ७३ औं ओभरको दोस्रो बलमा पुजारालाई ४५ रनमा जो रुटबाट क्याच गराउँदै महत्वपूर्ण साझेदारी तोडेका थिए । पुजाराले २ सय ६ बलमा ४ चौका प्रहार गरे । पुजारा विकेटसँगै इंग्ल्यान्डले खेलमा पूनरागमन गरेका थियो । मोईन अलीले जस बटलरबाट रहाणेलाई ६१ रनमा क्याच आउट गराए । रहाणेले १ सय ४६ बलमा ५ चौका प्रहार गरे । अलीले रविन्द्र जडेजालाई तीन रनमा बोल्ड आउट गरे । भारतका विकेटकिपर ऋषभ पन्त २२ र ईशान्त शर्मा १६ रनमा आउट भए । इंग्ल्यान्डका मार्क वुडले तीन, मोईन अली र ओली रोबिन्सनले दुई दुई विकेट लिए । साम करनले एक विकेट लिएका छन् ।
त्यसअघि तेस्रो दिन इंग्ल्यान्ड पहिलो इनिङमा १ सय २८ ओभरमा ३ सय ९१ रनमा अल आउट भएको थियो । इंग्ल्यान्डका कप्तान जो रुट ३ सय २१ बलमा १८ चौका सहित १ सय ८० रनमा अविजित रहँदै उत्कृष्ट शतकीय इनिङ खेले । रुटको यो टेस्ट करीअरको २२ औं शतक हो । रुटले भारतविरुद्ध लगातार दोस्रो शतक प्रहार गरेका हुन् । पहिलो टेस्टको दोस्रो इनिङमा रुटले १ सय ९ रनको सानदार शतकीय इनिङ खेलेका थिए । रुटले आफ्नो टेस्ट करीअरको नौं हजार रन पनि पूरा गरे । रुट टेस्टमा इंग्ल्यान्डमा एलिस्टर कुकपछि सर्वाधिक रन बनाउने खेलाडी हुन् ।
मोहम्मद शिराजले १५ औं ओभरमा लगातार दुई विकेट लिएका थिए । तेस्रो विकेटका लागि रुट र रोरी बन्र्सले ८५ रनको महत्वपूर्ण साझेदारी गरेका थिए । दोस्रो दिनको अन्तिम समयतिर बन्र्सलाई मोहम्मद शामीले ४९ रनमा एलबिडब्लू आउट गरे । उनले १ सय ३६ बलमा ७ चौका प्रहार गरे ।
कमजोर सुरुवात गरेको घरेलु टोली इंग्ल्यान्डलाई चौथो विकेटका लागि रुट र जोनी बेयरस्टोले १ सय २१ रनको महत्वपूर्ण साझेदारी गर्दै बलियो योगफलतर्फ अघि बढाएका थिए। बेयरस्टोलाई मोहम्मद शिराजले कप्तान विराट कोहलीबाट ५७ रनमा क्याच गराउँदै चौथो सफलता दिलाए । बेयरस्टोले १ सय ७ बलमा ७ चौका प्रहार गरे ।
त्यसपछि भने रुटले राम्रो साथ पाउन सकेनन् । पाँचौं विकेटका लागि विकेटकिपर जस बटलरसँग ५४ रनको साझेदारी गरेका थिए । बटलरलाई ईशान्त शर्माले २३ रनमा बोल्ड आउट गरे । छैटौं विकेटका लागि रुटले मोईन अलीसँग ५८ रन जोड्दै टोलीलाई अगाडि बढाएका थिए । ईशान्तलेनै अलीलाई २७ रनमा विराट कोहलीबाट क्याच आउट गराए ।
ईशान्तको बलमा साम करन गोल्डेन गक आउट भए । ओली रोबिन्सन ६ र मार्कवुड ५ रनमा रन आउट भए । अन्तिम विकेटको रुपमा जेम्श एन्डरसन आउट भएका थिए । भारतका तीव्र गतिका बलर मोहम्मद शिराजले सर्वाधिक चार विकेट लिए । ईशान्त शर्माले तीन र मोहम्मद शामीले दुई विकेट लिए ।
त्यसअघि टस हारेर ब्याटिङको निम्तो पाएको भारत १२६.१ ओभरमा ३ सय ६४ रनमा अल आउट भएको थियो । भारतका ओपनर लोकेश राहुलले २ सय ५० बलमा १२ चौका र १ छक्का सहित सर्वाधिक १ सय २९ रनको योगदान दिए । राहुलले यो टेस्ट करीअरको छैटौं शतक हो ।
भारतलाई ओपनर रोहित शर्मा र लोकेश राहुलले ४३.४ ओभरमा १ सय २६ रनको शतकीय साझेदारीका साथ उत्कृष्ट सुरुवात दिलाएका थिए । तीव्र गतिका बलर जेम्स एन्डरसनले रोहितलाई ८३ रनमा बोल्ड आउट गर्दै पहिलो विकेट लिन सफल भए । रोहितले १ सय ४५ बलमा ११ चौका र १ छक्का प्रहार गर्दै उत्कृष्ट सुरुवात दिलाएका थिए ।
एन्डरसनलेनै चेतेश्वर पुजारालाई ९ रनमा जोनी बेयरस्टोबाट क्याच आउट गराए । तेस्रो विकेटका लागि विराट कोहली र राहुलले १ सय १७ रनको साझेदारी गरेका थिए। दिनको अन्तिम समयमा विराट कोहली ओली रोबिन्सनको बलमा जो रुटबाट ४२ रनमा क्याच आउट भए ।
दोस्रो दिन इंग्ल्यान्डले बलिङमा उत्कृष्ट पूनरागमनका साथ भारतलाई मध्यम योगफलमै रोकेको थियो । एक समय २७८–३ को अवस्थामा रहेको भारतले बाँकी ८६ रन जोड्न ७ विकेट गुमाउँदै अल आउट भएको थियो ।
दोस्रो दिनको दोस्रो बलमै राहुललाई रोबिन्सनले सिब्लेबाट क्याच गराएका थिए । अजिक्या रहाणे जेम्श एन्डरसनको बलमा एक रनमा जो रुटबाट क्याच आउट हुन पुगे । पन्तले ५८ बलमा ५ चौका सहित ३७ रन जोडे । रविन्द्र जडेजाले १ सय २० बलमा ३ चौका सहित ४० रनको योगदान दिए ।
पन्त र जडेजा दुबै मार्कवुडको बलमा क्याच आउट भएका थिए । ईशान्त शर्मा ८ रनमा आउट हुँदा मोम्मद शामी, जस्प्रित बुमराह र मोहम्मद शिराजले खाता खोल्न सकेनन् । इंग्ल्यान्डका तीव्र गतिका बलर जेम्श एन्डरसनले सर्वाधिक पाँच विकेट लिए । ओली रोबिन्सन र मार्कवुडको नाममा दुई दुई विकेट रह्यो । स्पिनर मोईन अलीले एक विकेट लिए । पाँच टेस्ट सिरिजमा पहिलो खेल बराबरीमा सकिएको थियो ।
तेस्रो टेस्ट २५ अगष्ट देखि लिड्समा सुरु हुने छ ।
