२ भदाै, जनकपुरधाम ।
प्रदेश नं २ का नवनियुक्त प्रदेश प्रमुख हरिशङ्कर मिश्रले पदभार ग्रहण गरेका छन् । जनकपुरधामको मधेश भवनस्थित कार्यालयमा आज उनले पदभार ग्रहण गरेका हुन् ।
सो अवसरमा प्रमुख मिश्रले प्रदेश सरकारसँग समवन्य र सहकार्य गर्दै प्रदेशको शान्ति, विकास, सुरक्षाको प्रत्याभूतिका लागि आफू अग्रसर रहने बताए ।
उनलाई मन्त्रिपरिषद् बैठकले प्रदेश २ का प्रमुखमा नियुक्तिका लागि गत मंगलबार राष्ट्रपतिसमक्ष सिफारिस गरेको थियो । मंगलबार अपराह्न राष्ट्रपति कार्यालयमा राष्ट्रपति विद्यादेवी भण्डारीबाट पद तथा गोपनीयताको शपथग्रहण गरेका मिश्र प्रदेश प्रमुखको कार्यभार सम्हाल्न बुधबार मध्याह्न प्रदेश २ को अस्थायी राजधानी जनकपुरधाम आएका हुन् ।
