३ भदाै, एजेन्सी ।
अफगानिस्तानमा तालिवान विद्रोहीले कब्जा जमाएपछि त्यहाँ रहेका विभिन्न देशका नागरिकसँगै केही अफगानीहरु पनि देश छोड्न विमानस्थलमा भेला भएका छन् । बाहिरिनेको लर्कोले विमानस्थल अस्तव्यस्त भएको छ ।
विमानस्थल बाहिर गस्ती गरिरहेका तालिवान लडाकुहरुले भीडलाई तितर बितर पार्न हवाई फायर गरेका छन् । पछिल्लो २४ घन्टामा मात्रै अफगानिस्तानबाट ५ हजार जना बाहिरिएका छन् ।
अमेरिकी विशेष सैन्य टोलीले विमानस्थलको सुरक्षा र विभिन्न देशका नागरिको बहिर्गमनको व्यवस्थापन गर्दै आएको छ । अफगानिस्तानमा रहेका विदेशी मात्र नभइ अमेरिकाले संचालन गरेको मिसनमा सहयोग गर्ने अफगानीहरु तालिबानको त्रासले देश छोड्न हतारिएका छन् ।
तर विमानस्थल बाहिर गस्तीमा रहेका तालिवान लडाकुहरुले अफगानी नागरिकलाई विमानस्थल प्रवेशमा रोक लगाएका छन् । उनीहरुले अमेरिकी पासपोर्ट भएकालाई मात्रै विमानस्थल प्रवेश गर्न दिएका छन् ।
