४ भदौ, काठमाडौं ।
माधवकुमार नेपाल नेतृत्वको पार्टी ‘नेकपा एमाले समाजवादी’मा नेकपा एमाले नरहने भएको छ ।
एमाले विभाजन गरेका नेता नेपालले बुधबार आफ्नो नेतृत्वमा नेकपा एमाले समाजवादी दर्ताका लागि निर्वाचन आयोगमा निवेदन दिएका थिए ।
यद्यपि राजनीतिक दलसम्बन्धी अध्यादेशअनुसार नियमावली बिहीबार मात्र आएकाले शुक्रबार फेरि निवेदन दिने तयारी छ । नेपाल समूहका नेताहरुका अनुसार नेपाल कम्युनिस्ट पार्टी एकीकृत समाजवादी वा नेपाल कम्युनिस्ट पार्टी समाजवादी नाममा पार्टी दर्ता हुने सम्भावना छ ।
त्यसको अघिल्लो दिन नेता डा. विजय पौडेल आयोग पुगेका थिए । आयोगका अधिकारीहरुले सर्वोच्च अदालतको २३ फागुनको फैसलाअनुसार एउटा पार्टीको नाममा विशेषण झुण्ड्याएर अर्को दल दर्ता गर्न नमिल्ने बताएका छन् ।
