४ भदौ, काठमाडौं ।
माधवकुमार नेपालको साथ छाडेका नेताहरुले नेकपा एमालेका अध्यक्ष केपी शर्मा ओलीले १० बुँदे सहमति कार्यान्वयन नगरे विद्रोह गर्ने भएका छन्।
सरकारले राजनीतिक दल विभाजन सम्बन्धि अध्यादेश जारी गरेपछि एमाले वरिष्ठ नेता माधव कुमार नेपालले नयाँ पार्टी गठन गर्दा नेपालको साथ छोडेका स्थायी कमिटी, केन्द्रीय कमिटी सदस्यहरु र सांसदहरुले बैठक बसेर अन्तिम पटक ओलीलाई १० बुँदे सहमति गराउन प्रयास गर्ने, र त्यसो नभएमा विद्रोह गर्ने भएका हुन्।
नेपालको साथ छोडेका नेताहरु महाराजगञ्जको एक पार्टी प्यालेसमा बसेर छलफल गरिरहेको र त्यसपछि एउटा टुंगोमा पुग्ने नेता निरज आचार्यले बताए ।
एमाले विभाजन र नयाँ पार्टी निर्माण दुबै अतिवादी भएको भन्दै उनीहरु बीचधारमा रहेका थिए। बिहीबार माधवको साथ छाडेका ९ जना स्थायी कमिटी सदस्यहरुले ओलीले १० बुँदे सहमति कार्यन्वयन गर्नुपर्ने भन्दै विज्ञप्ति जारी गरेका थिए।
