११ भदौ, बुटवल ।
अविरल वर्षाका कारण आएको बाढीले बगाउँदा नवलपरासीमा दुई जनाको मृत्यु भएको छ भने एक जना अझै बेपत्ता छन् ।
जिल्ला प्रहरी कार्यालय परासीका प्रहरी नायब उपरीक्षक राजु लामाका अनुसार मृत्यु हुनेमा रामग्राम नगरपालिका–१८ बञ्जरियाका ३७ वर्षीय विनोद प्यासी र उनका छोरा १३ वर्षीय प्रदीप रहेका छन् । त्यस्तै सुनवल नगरपालिका–१४ की एलिसा तामाङ बेपत्ता भएकी छन् ।
घरमा बाढी पसेपछि ज्यान बचाउन निस्किँदा खेतमा डुबेर उनीहरूको मृत्यु भएको जनाइएकाे छ । उनीहरूको शव केही तल खेतमा फेला परेको थियो । तामाङको अवस्था भने अहिलेसम्म अज्ञात रहेको छ । उनलाई पनि बाढीले बगाएको प्रहरीको अनुमान छ ।
गए रातिदेखिको भीषण वर्षाले नवलपरासी सदरमुकाम परासी बजार डुबानमा परेको छ ।
