१६ भदौ, काठमाडौं।
नेपाली राष्ट्रिय फुटबल टोलीका कप्तान किरण चेम्जोङले प्रशिक्षक अब्दुल्लाह अलमुताइरीले टोलीलाई मानसिक रुपमा बलियो बनाउँदै बुबाजस्तो व्यवहार गर्ने गरेको बताएका छन् ।
आज भएको प्रि–म्याच कन्फरेन्समा बोल्दै कप्तान चेम्जोङले टोलीको तयारी राम्रो रहेको पनि बताए । उनले भने, ‘१३ वर्ष राष्ट्रिय टोलीको अनुभवमा धेरै प्रशिक्षकसँग काम गरे । हामी पहिला शारीरिक रुपमा मात्र बलिया थियौँ । अहिले हामीलाई उहाँले मानसिक रुपमा पनि बलियो बनाउनुभएको छ । हाम्रो प्रशिक्षक मात्र होइनन्, बाबु समान व्यवहार गर्नुहुन्छ । टोलीको मनोबल पनि उच्च छ ।’
किरणले दुई महिनादेखि टोली तयारीमा रहेकोले शारीरिक रुपमा पनि राम्रो अवस्थामा रहेको बताउँदै घरेलु मैदानमा भारतविरुद्ध खेल्न पाउनुले आउने साफ च्याम्पियनसिपका लागि राम्रो तयारी हुने बताए । किरणले भने, ‘खेल फिफा डेटमा हुन लागेको छ । वरीयतामा असर गर्ने भएर पनि हाम्रो लागि यो जरुरी खेल हो । इज्जतका लागि खेल्छौं ।
किरण भारतविरुद्ध खेलमा उत्रिए ७३ औं पटक राष्ट्रिय टोलीबाट खेल्नेछन् । उनले यससँगै विराज महर्जनको राष्ट्रिय टोलीबाट सर्वाधिक ७३ खेल खेल्ने कीर्तिमान बराबर गर्नेछन् । नेपाल र भारतबीच ६ वर्षपछि पहिलो पटक दशरथ रंगशालामा खेल हुँदैछ । खेल साँझ ५ः३० बजे सुरु हुने बताइएको छ । एन्फाले सिमित दर्शकलाई प्रवेश दिनका लागि सरकारबाट स्वीकृति लिएको बताएको छ ।
