२० भदौ, लमजुङ ।
लमजुङका ७४ वडामा नेपाली कांग्रेसको अधिवेशन टुंगिएको छ । कांग्रेसको १४औं महाधिवेशनअन्तर्गत जिल्लाका ७५ मध्ये ७४ वडाको अधिवेशन टुंगिएको हो ।
६३ वडामा सर्वसम्मत र ११ वडामा निर्वाचनका माध्यमबाट नेतृत्व चयन भएको कांग्रेस लमजुङका सचिव हरिप्रसाद बरालले बताए । उनका अनुसार दुधपोखरी गाउँपालिका–५ कोल्कीमा आइतबार निर्वाचन हुँदैछ ।
बेसीसहरको वडा नम्बर ३ र ८ ,दोर्दी गाउँपालिकाको १ भारते, राइनास नगरपालिका ९ र ४, सुन्दरबजार नगरपालिका ३, ४ ,६, ७ ,९ नम्बर वडा र मध्यनेपाल नगरपालिका–४ मा निर्वाचनबाट नेतृत्व चयन भएको हो ।
लमजुङमा चार नगरपालिका र चार गाउँपालिका गरी आठ स्थानीय छन् । जिल्लामा आठ हजार तीन सय ६९ क्रियाशील सदस्य छन् । नयाँ चार हजार तीन सय ३६ जना क्रियाशील सदस्य थप भएको सचिव बरालले बताए । पुराना चार हजार ३३ जनाले नवीकरण गरेको उनको भनाइ छ ।
