२१ भदौ, काठमाडौं ।
नेपाली राष्ट्रिय यू–२३ फुटबल टोलीको प्रशिक्षकको जिम्मेवारी बालगोपाल महर्जनले पाएका छन् । राष्ट्रिय टोलीको प्रशिक्षण सम्हालिसकेका महर्जनले यू–२३ टोलीको जिम्मेवारी सम्हाल्ने एन्फाले सोमबार वेबसाइटमा जनाएको छ ।
महर्जनसँगै रोजित केसी सहायक प्रशिक्षक र ललित चन्द गोलरक्षक प्रशिक्षकमा नियुक्त भएका छन् । नेपालले अक्टोबर अन्तिम साता ताजिकिस्तानमा एएफसी यू-२३ एसियन कपको छनोट खेल्दैछ ।
महर्जनले यसअघि पनि यू-२३ छनोटमा टोलीको प्रशिक्षण सम्हालेका थिए । उनकै प्रशिक्षणमा नेपालले चैतमा थ्री नेसन्स कपको उपाधि जितेको थियो ।
नेपालले छनोटअन्तर्गत अक्टोबर २३ मा इरान, अक्टोबर २८ मा ताजिकिस्तान र अन्तिम खेलमा अक्टोबर ३१ तारिखमा लेबनानको सामना गर्नेछ । प्रत्यक समूहको शीर्ष टोलीले सिधै अन्तिम प्रतियोगितामा स्थान बनाउने छन् । त्यस्तै दोस्रो स्थान हासिल गर्ने शीर्ष ४ टोली पनि छनोट हुनेछन् ।
