विराटनगर,असार ३१
नेपाली कांग्रेसका नेता कृष्णप्रसाद सिटौलाले दुई तिहाईको दम्भमा सरकार संविधानलाई तहसनहस बनाउने खेलमा लागेको आरोप लगाएका छन् । विराटनगरमा शनिबार अगुवा कार्यकर्ता भेलालाई सम्बोधन गर्दै नेता सिटौलाले सरकारकै आडमा मुलुकमा मनपरीतन्त्र मौलाउँदै गएको बताए ।
दुई तिहाईको बलमा सरकारले संविधान र कानुनविपरीतका काम गरिरहेको छ,” नेता सिटौलाले भने, “सरकारले प्रतिपक्षमा कांग्रेस छ भनेर बुझोस् । अब सरकार हुकुमी र तानाशाही शैलीमा अगाडि बढे कांग्रेसले प्रतिवाद गर्दछ ।” उनले प्रजातन्त्रका लागि २००७ सालदेखि लड्दै आएको कांग्रेसलाई कमजोर नठान्न कम्युनिष्ट सरकारलाई चेतावनीसमेत दिए ।
सरकारले संविधान र कानुनलाई गलत प्रयोग गरिरहेको उनको भनाइ थियो । समृद्धिको नारा कुनै पार्टी विशेषको नभएको उनको भनाइ थियो । लोकतान्त्रिक मूल्यमान्यतामा रहेर मुलुकको समग्र आर्थिक समृद्धि गर्ने संविधानमै उल्लेख भएको उनले बताए । “आर्थिक समृद्धि कुनै कम्युनिष्ट पार्टीको होइन, यो त संविधानमै उल्लेख छ,” उनले भने, “नेपाली जनताको अपमान हुने गरी सरकारले संविधानको प्रयोग गरिरहेको छ ।”
गठन भएको ६ महिना पनि नबित्दै सरकारप्रति गम्भीर आशंका उब्जिएको उनको कथन थियो । मुलुकको पछिल्लो घटनाक्रमले सरकारप्रति जनताको भरोसासमेत गिर्दै गएको सिटौलाले बताए । “प्राज्ञिक क्षेत्रको नेतृत्व गर्दै विदेश उड्न लागेको उपकुलपतिलाई प्रधानमन्त्री केपी शर्मा ओलीको ठाडो निर्देशनमा गिरफ्तारीको शैलीमा बालुवाटार पु¥याइन्छ,” उनले भने, “अनि घन्टौंसम्म राखिन्छ र छोडिन्छ । यो कस्तो लोकतन्त्र हो ?” उपकुलपतिलाई अगाडि नै विदेश भ्रमण अस्वीकृत भएको जानकारी दिन सकिने उनले बताए । तर, सरकारले दम्भका भरमा अन्य कर्मचारी र प्राज्ञिक क्षेत्रलाई समेत त्रासमा राख्न खोजेको उनले आरोप लगाए ।
नेता सिटौलाले अहिले शिक्षा र स्वास्थ्यमा अराजकता आएको टिप्पणी गरे । स्थानीय तहले आफैं ऐन कानुन बनाउने र शिक्षा र स्वास्थ्यलाई आफ्नो पकडमा राख्ने काम गरिरहेको उनको भनाइ थियो । “स्थानीय तहमा जुन–जुन पार्टीले जितेका छन् उनीहरूले शिक्षा र स्वास्थ्यमा राजनीति हाबी गराउँदैछन्,” उनले भने, “केन्द्र सरकारले तुरुन्त विचार गरेन भने भयावह अवस्था सिर्जना हुन सक्छ ।”
सिटौलाले कांग्रेसमा गाउँ तहदेखि केन्द्रसम्म आमुल परिवर्तन आवश्यक रहेको विचार व्यक्त गरे । “समयको प्रवाहलाई कांग्रेसले बुभ्mन सकेको छैन,” उनले भने, “अब पनि समय र परिवर्तनको प्रवाहलाई बुझिएन भने कांग्रेस अवस्था कमजोर हुन्छ ।” नेतामा मात्रै होइन कार्यकर्तामा पनि परिवर्तन जरुरी रहेको उनले बताए । “ठूला नेताले मात्रै होइन गाउँ तहको कार्यकर्ताले पनि समयको माग र जनताको आवश्यकता बुभ्mनु प¥यो,” उनले भने ।
कार्यक्रममा केन्द्रीय सदस्य अमृत अर्याल, नेता अशोक कोइराला, सांसद केदार कार्की, विराटनगर महानगरपालिकाका प्रमुख भीम पराजुलीलगायतले सरकारले गरेका गलत कामका विरुद्ध कांग्रेसले सडक र सदनबाट आन्दोलन थाल्नुपर्नेमा जोड दिए । कार्यक्रममा कांग्रेसनिकट प्राध्यापक, बुद्धिजीवि, कानुन व्यवसायी, शिक्षक, व्यवसायीलगायतको सहभागिता थियो ।
