२८ भदौ, काठमाडौं ।
नेपाल कम्युनिस्ट पार्टीका महासचिव नेत्रविक्रम चन्द विप्लवले मिलेनियम च्यालेन्ज कर्पोरेसन (एमसीसी) कुनै हालतमा लागू हुन नदिने बताएका छन् ।
सोमबार खुलामञ्चमा आयोजित विरोध सभामा पानीले भिन्दै सम्बोधन गरेका विप्लवले पार्टी प्रतिबन्धमा रहेका बेला नै यो सम्झौता अध्ययन गरेको भन्दै कुनै हालतमा लागू हुन नदिने बताएका हुन् । उनले अघि भने, ‘यो सम्झौता नेपालको स्वाधीनता र सार्वभौमिकताको विरोधमा छ ।’
अमेरिकाले जुन देशबाट आफ्नो राष्ट्रिय सुरक्षामा चुनौती हुन्छ, त्यहीँ एमसीसी लागू गर्ने गरेको उनले बताए । नेपालमा पनि लप्सीफेदीदेखि सुगौलीसम्म बनाइने विद्युतका टावरको सुरक्षा खतराका नाममा अमेरिकी फौज नेपाल आउने खतरा देखिएको विप्लवले बताए ।
उनले भने, ‘आज त हामी एउटा सानो झिल्को बोकेर काठमाडौंमा उत्रिएका छौं । यदि एमसीसी जबरजस्ती पास गर्न खोजियो भने यो झिल्को राँको बन्छ ।’
उनले आफूहरुले प्रतिबन्ध झेल्ने क्रममा १२ जना साथीहरु गुमाएको पनि उनले बताए । ‘१२ जना कमरेडहरूको रगत मिसाएर यहाँ आएका छौं । २५ सय योद्धाको बन्दी जीवन भोगेर आएका छौं । तीन हजार भन्दा धेरै मुद्दा खेपेर आउँदैछौं’, उनले थपे, ‘हामीले उतिबेलै प्रतिबन्ध गलत छ भनेका थियौँ । तपाईंहरुको प्रतिबन्ध ठीक थिएन । तर हामी नयाँ प्रक्रियामा आएर तीन बुँदे सहमति भयो ।’
उनले शान्ति वार्तामा आएपछि पनि शंका गरिएको बताए । ‘हामीलाई वार्तामा त आउनु भयो तर बन्दुक खोइ भनेर सोधियो’, उनले भने, ‘अहिले हामीसँग बन्दुकको कुरा नगर्नु । हामीसँग जनताको तागत छ । जनताको तागत बम र गोलीभन्दा बलियो हुन्छ ।’
