विराटनगर,असार ३१
अघिल्लो दिनको तुलनामा सप्तकोशी नदीको वहावमा केही कमी आएको छ । शनिवार राती २ लाख ३० हजार २ सय ६० क्युसेक प्रतिसेकण्ड वहाव मापन गरिएको कोशीमा पछिल्लो मापन अनुसार वहाव २ लाख २१ हजार ३ सय ३५ रहेको छ ।
कोशी ब्यारेजका २९ वटा ढोका खोलिएका छन् । कोशीको तिव्र वहाव राजबास स्थित रहेको २६–८८ स्परमा सिधा ठोकिरहेको भएपनि स्परमा भने कुनै खतरा देखिएको छ्रैन् । कोशीको २६–८८ स्परलाई संवेदनशील मानिन्छ भने २६–४०,२७–१० र २७–४० लाई खतराका रुपमा लिइन्छ ।
सुनसरी प्रशासनले कोशीको वहावमा उतारचढाव जारी रहेपनि अवस्था सामान्य रहेको जनाएको छ । सुनसरीका प्रमुख जिल्ला अधिकारी प्रेमप्रकाश उप्रेतीले नदीमा कुनै खतरा नरहेको स्पष्ट पारेका छन् । पहाडी भेगमा वर्षा जारी रहेकाले कोशीको वहावमा थप उतारचढाव हुन सक्ने अनुमान गरिएको छ । पहाडी भेगको वर्षाले नदीको वहावमा प्रत्यक्ष प्रभाव पार्ने गर्छ ।
शनिवार अपरान्ह नदीको वहाव बढेसँगै चतरा स्थित कोशी नदीमा राखिएको कोशी जल स्तर मापन केन्द्रले चेतावनी तह पार गरेको थियो । जल स्तर मापन केन्द्रले ५ दशमलव ६० मिटर लाई चेतावनी तह मान्ने गर्छ भने ६ दशमलव ८० मिटर लाई खतरा मान्ने गर्छ । पछिल्लो अवस्थामा चतरामा समेत कोशी नदीको वहावमा कमी आएको छ ।
चतरामा रहेको जल मापन केन्द्रमा देखिएको जलस्तरको प्रभाव कोशी ब्यारेज सम्म आइपुग्न कम्तिमा २ देखि ३ घण्टा लाग्ने हुन्छ । ब्यारेजमा गरिएको बहावको मापन अनुसार ब्यारेजका ढोका खोल्ने र बन्द गर्ने गरिन्छ । जसको सम्पूर्ण अधिकार भारतीय पक्षसँग मात्रै रहेको छ ।
