२९ भदौ, काठमाडौं ।
करिब ६० वर्षअघि काठमाडौंबाट चोरी भएर अमेरिकामा अवैध रुपमा बेचिएको दशौं शताब्दीतिरको उमा–महेश्वर मूर्ति अमेरिकाले नेपाललाई हस्तान्तरण गरेको छ । साेमबार अमेरिकाको कोलोराडोस्थित डेनभर आर्ट म्युजियमले अमेरिकास्थित नेपाली राजदूतावासलाई उमा महेश्वरको मूर्ति हस्तान्तरण गरेको हो ।
उक्त म्युजियमको टोलीले अमेरिकास्थित नेपाली राजदूत डा. युवराज खतिवडालाई मूर्ति हस्तान्तरण गरेको हो । यो मूर्ति ललितपुरको पाटनबाट ६० वर्षअघि चोरी भएको लैनसिंह बाङ्देलले लेखेको पुस्तक ‘स्टोलन इमेजेज् अफ नेपाल’ उल्लेख छ । यो मूर्ति सन् १९६० को मध्यतिर चोरी भएको उनले पुस्तकमा लेखेका छन् ।
यो मूर्ति इडविन एफ उलमन दम्पतीले सन् १९८० मा म्युजियमलाई उपहारस्वरुप दिएका थिए । यो मूर्ति त्यसयता उक्त म्युजियममै प्रदर्शनीमा राखिँदै आएको थियो । यो मूर्ति उलमन दम्पतीले सन् १९६८ मा भारतको राजधानी नयाँ दिल्लीबाट किनेका थिए ।
अन्य कयौं मूर्ति संकलन गरेका उनीहरुले उमा–महेश्वरको मूर्ति भने म्युजियमलाई उपहारस्वरुप प्रदान गरेका थिए ।
