३० भदाै, काठमाडौँ ।
नेकपा एमालेका उपमहासचिव विष्णु पौडेलले निर्वाचनपछि एमालेको तागत देखिने चेतावनी दिएका छन् ।
बुटवलमा बुधबार भएको एमाले कार्यकर्ता भेलालाई सम्बोधन गर्दै नेता पौडेलले यस्तो बताएका हुन् । उनले भने ‘हामी छिटो भन्दा छिटो जनतामा जान्छौँ जनताको मन जित्छौँ । र सरकारको नेतृत्व गर्छौँ ।’
एमालेबाट छुटिएका माधव नेपालप्रति लक्षित गर्दै उनले पार्टी फुटेको नभएर स्वार्थी तत्वहरु अलग्गिएको बताए । उनले माधव नेपालको पार्टीले चुनावमा एक सिट पनि नजित्ने दाबी समेत गरे । उनले भने ‘५४ सालमा पनि एमाले टुक्रिएको थियो । त्यसछपछिको चुनामा तत्कालीन मालेले एक सिट पनि जितेन । अहिले उनीहरु स्वार्थ र ईर्श्याका कारण अलग्गिएका हुन् । अहिले पनि उनीहरुले एक सिट पनि जित्दैनन् ।’
तर नेकपा एमालेले कहिल्यै बाटो नबिराउने भन्दै आगामी निर्वाचनमा बहुमतले विजयी हुने ठोकुवा गरे । यस्तै नेता पौडेलले वर्तमान सरकारबारे केही पनि गर्न नसकेको बताए । ‘दुई महिना भइसक्यो अहिलेसम्म यो सरकारले मन्त्रिपरिषदलाई पूर्णता दिएको छैन । सरकार बेखबर छ’ उनले भने ।
सत्ता पक्षको गठबन्धनप्रति व्यंग्य गर्दै उनले प्रतिपक्षका विरुद्ध बनेको गठबन्धन दिगो नभएको तर्क गरेका थिए । अरु सबै दल एकातिर र एमाले एक्लै एकतिर उभिएको उनको भनाइ थियो । एमाले एक्लै भए पनि अरु सबैभन्दा बलियो भएको उनले जिकिर गरे ।
