११ असाेज, काठमाडौं ।
चौथो संस्करणको एभरेष्ट प्रिमियर लिग (इपिएल) मा आजको दोस्रो खेल पनि स्थगित भएको छ ।
टियु मैदानको चिसो आउटफिल्ड र त्यसपछि वर्षाका कारण भैरहवा ग्ल्याडियटर्स र चितवन टाइगर्सबीचको खेल पनि स्थगित भएको हाे ।
दिउँसो १:३० सुरु हुनुपर्ने खेल चिसो आउटफिल्डका कारण स्थगित भएको थियो । खेल सुरु हुन ढिलाइ भएको केहीबेरमा नै पुन: वर्षा भएपछि मैदान कभरले ढाकिएको छ । वर्षासँगै खेल स्थगित भएको हो । अब दुई टोलीले अंक बाँड्ने वा खेल पुन: अर्को दिन खेलाइने भन्नेबारे आयोजक छलफलमा छ ।
निर्धारित समय अनुसार खेल १:३० सुरु हुने कार्यक्रम थियो । त्यसका लागि टस १ बजे हुनुपर्ने थियो । भैरहवाका कप्तान शरद भेषावकर र चितवनका सोमपाल कामीसँग छलफलपछि अम्पायरले टस स्थगित गरेका थिए । दोस्रो पटक १:४० मा अम्पायरले मैदान निरिक्षण गरेर फर्किएका थिए । दोस्रो निरिक्षण २:३० मा हुने भनिएको थियो ।
सोमबार बिहान हुनुपर्ने विराटनगर र काठमाडौं किंग्स इलेभेनबीचको खेल वर्षाको कारण स्थगित भइसकेको छ ।
