१ कात्तिक, काठमाडौं ।
नेपालमा विदेशी नागरिकका लागि हवाई भाडादर घटाइने भएको छ । बुद्ध एयरले जनवरी २०२२ बाट लागु हुने गरी डलर फेयर घटाउने निर्णय गरेको हो ।
कम्पनीका अनुसार डलर फेयर करीव ५० प्रतिशत हाराहारी घटाउने निर्णय भएको हो । यसले पर्यटक आकर्षित गर्न सहयोग पुग्ने अपेक्षा समेत कम्पनीले लिएको छ । कम्पनीका सेल्स एण्ड मार्केटिङ निर्देशक रुपेश जोशीले सुस्ताएको पर्यटन व्यवसायलाई पुनजीर्वित गर्न यो निर्णय महत्वपूर्ण सावित हुने अपेक्षा गरिएको बताए । कम्पनीका अनुसार काठमाडौंबाट पर्यटकका लागि सबैभन्दा व्यस्त रुट पोखरामा अब विदेशीलाई लिइने १०६ डलरबाट ६५ अमेरिकी डलरमा झारिने भएको छ ।
नेपालमा पर्यटन व्यवसायीले डलर फेयर हटाउनु पर्ने माग गरिरहेका थिए । सरकारले समेत डलर फेयर हटाउने प्रयास गरे पनि सफल भने हुन सकेको छैन ।
यस्तो छ परिमार्जित भाडादर
काठमाडौं–पोखरा : ६५ डलर
काठमाडौं–विराटनगर : ७६ डलर
काठमाडौं–जनकपुर : ४२ डलर
काठमाडौं–सिमरा : ३० डलर
काठमाडौं–भैरहवा : ६५ डलर
काठमाडौं–धनगढी : १३८ डलर
काठमाडौं–नेपालगञ्ज : १०२ डलर
काठमाडौं–भद्रपुर : ९४ डलर
