१० कात्तिक, लुम्बिनी ।
रुपन्देहीमा एक महिलाले चम्ल्याहा सन्तान जन्माएकी छन् । रुपन्देहीकाे भैरहवास्थित युनिभर्सल कलेज अफ मेडिकल साइन्सेज शिक्षण अस्पतालमा पाल्पाको माथागढी गाउँपालिका–१ की २४ वर्षीया सीता सार्कीले चम्ल्याहा छोरीलाई जन्म दिएकी हुन् ।
कात्तिक ६ गते अस्पताल भर्ना गरिएकी उनले ९ गते दिउँसो ४ छोरीलाई जन्म दिएको अस्पतालका जनसम्पर्क अधिकृत सुशिल गुरुङले बताए । सार्कीलाई महिला तथा प्रसूती विशेषज्ञ डा. तारा केसीको टीमले शल्यक्रिया मार्फत सुत्केरी गराएको थियो । हाल शिशु र आमाको स्वास्थ्य अवस्था सामान्य रहेको गुरुङले बताए ।
अस्पतालका अनुसार पहिलो शिशुको तौल ११ सय ग्राम, दोस्रोको ११ सय १५ ग्राम, तेस्रोको १ हजार ६० ग्राम र चौथोको ११ सय ३० ग्राम रहेको छ ।
सामान्यतः दुई–दुई किलो पाँच सय ग्राम तौलसम्मको बच्चा जन्मिएमा सामान्य मानिन्छ । तर, सार्कीले जन्माएका चार छोरीको तौल आधा कम छ । बच्चा स्वस्थ हुँदाहुँदै पनि तौल कम भएकाले बाहिर इन्फेक्सन नहोस् भनेर एनआईसीयूमा राखिएको जनाइएकाे छ ।
