१२ कात्तिक, काठमाडौं ।
नेपाली राष्ट्रिय यू-२३ फुटबल टोली एएफसी यू-२३ एसियन कप छनोट प्रतियोगिताको समूह चरणबाट नै बाहिरिएको छ । विहीबार भएकाे खेलमा आयोजक ताजिकिस्तानसँग ६-० को फराकिलो हार बेहोरेपछि नेपालको छनोट हुने सम्भावना समाप्त भएको हो ।
पहिलो हाफमा ३-० ले पछि परेको नेपाली टोलीले दोस्रो हाफमा पनि ३ गोल खाएको थियो । पहिलो खेलमा इरानसँग ३-० ले पराजित नेपाली टोलीले पुन: एकपटक एसियन यू-२३ छनोटमा गोल गर्न सकेन । अघिल्लो दुवै प्रतियोगितामा गोलविहिन नेपालले पुन: एकपटक खेलमा विपक्षीलाई दबाब दिन सकेन । काउन्टर अट्याकमा भर परेको नेपालले खासै बल पोसेसन राख्न पनि सकेन ।
समूह अन्तर्गत विहीबार नै भएको पहिलो खेलमा इरानले लेबनानलाई २-० ले पराजित गरेको थियो । पहिलो खेलमा ताजिकिस्तानसँग १-० ले पराजित लेबनानको पनि छनोट हुने सम्भावना सकिएको छ । इरान र ताजिकिस्तानको ६-६ अंक हुँदा नेपाल र लेबनान अंकविहिन छन् । अब नेपाल र लेबनानले अन्तिम खेलमा एक अर्काको सामना गर्नेछन् । त्यस्तै इरान र ताजिकिस्तानबीच समूह विजेता बन्नका लागि प्रतिस्पर्धा हुनेछ ।
समूहको शीर्ष टोली सिधै अन्तिम चरणमा छनोट हुँदा दोस्रो स्थान हासिल गर्ने उत्कृष्ट चार टोली पनि अघि बढ्नेछन् । नेपालले हालसम्म एएफसीको यू–२३ एसियन कप प्रतियोगिताको छनोट चरण पार गर्न सकेको छैन ।
