१२ कात्तिक, काठमाडाैँ ।
नेकपा(एकीकृत समाजवादी) पार्टीका अध्यक्ष माधवकुमार नेपालले आफ्नो समुह छाडेर एमालेमा बस्ने नेताहरुको हरिबिजोग हुने बताएका छन् । शुक्रबार पोखरा पुगेका अध्यक्ष नेपालले नेपाल पत्रकार महासंघ गण्डकी प्रदेश समितिले आयोजना गरेको पत्रकार भेटघाट कार्यक्रममा बोल्दै एमालेमा कुनै नीति र विधि नभएको उल्लेख गर्दै त्यहाँ रहनेहरु नीजि कम्पनिको सदस्यका रुपमा रहने जिकिर गरे ।
केपी ओलीप्रति बफादार नहुनेहरुको हरिबिजोग हुने उनको तर्क छ । उनले भने– ‘मैले पटक पटक भनेको थिए, बालुवा पेलेर तेल निस्कनेवाला छैन । आज सुधारौला भनेर गएका साथीहरुको हरिबिजोग भइरहेको छ । देखिरहनु भएको छ । उहाँको(ओली) आफ्नै नीति र विधि छ । त्यसमा बसेका मान्छे उहाँको नीजि कम्पनिका सदस्यका रुपमा रहन बाध्य हुनेछन् । त्यो कुनै सामुहिकताको सिद्धान्तबाट चल्दैन । त्यसले कमिटी प्रणालीलाई पालना गर्ने छैन । त्यहाँ केपी ओलीप्रति बफादार हुनेसँग बस्न पाइन्छ । बफादार भएन भने उसको हरिबिजोग हुनेछ ।’
उनले एमाले छाड्नेहरुको भविष्य सुरक्षित रहने पनि बताए । एमालेमा बस्नेहरुको भविष्य नभएको भन्दै उनले अब एमालेलाई टर्च बालेर खोज्नुपर्ने स्थिति आउने बताए। ओलीसँगै एमालेपनि सकिने उनको भनाई छ ।
