१६ कात्तिक, महोत्तरी ।
महोत्तरी मनरासिस्वा नगरपालिकामा २०७४ मा भएको स्थानीय तह निर्वाचनको वडाध्यक्ष पदमा विजयी उम्मेदवारले पदभार ग्रहण गरेका छन् । अदालतको आदेशपछि भएको पुनः मतगणनामा विजयी भएका महोत्तरी जिल्लाको मनरासिस्वा नगरपालिका–१० का अध्यक्ष रामेशकुमार रायले पदभार ग्रहण गरेका हुन्।
आसन्न स्थानीय तहको निर्वाचन नजिकिँदै गर्दा महोत्तरी मनरासिस्वा नगरपालिकामा २०७४ मा भएको स्थानीय तह निर्वाचनको वडाध्यक्षमा पदमा पराजित स्वतन्त्र उम्मेदवार विजयी भएका थिए । उच्च अदालत जनकपुरधाम र सर्वोच्च अदालतले दिएको आदेश बमोजिम महोत्तरीको मनरासिस्वा नगरपालिका–१० को पुनः मतगणना हुँदा पराजित उम्मेदवार विजयी भएका थिए । स्वतन्त्र उम्मेदवार रमेश राय २ भोटले विजयी भएका थिए ।
मनरा स्थित नगरपालिकाको कार्यालयमा आयोजित एक समारोहमा मेयर सञ्जयकुमार सिंहले वडाध्यक्ष रायलाई पदभार ग्रहण गराएका हुन्। पदभार ग्रहण कार्यक्रममा बोल्दै अध्यक्ष रायले ढिलै भए पनि सत्यको विजय भएको छ, न्यायालयले जनताको मतको सम्मान गरेको भन्दै खुशी व्यक्त गरे ।
२०७४ असोजमा भएको स्थानीय तहको निर्वाचनमा दुवै जनाले बराबर २६७÷२६७ मत ल्याएका थिए । त्यस बेला गोलाप्रथा गर्दा नेपाली काँग्रेसका उम्मेदवार अरुणकुमार चौधरी विजयी भएका थिए ।
त्यसपछि वडाध्यक्षमा पराजित रमेश राय मतगणनामा धाँधली भएको भन्दै उच्च अदालतमा मुद्दा दायर गरेका थिए। सर्वोच्चको आदेश अनुसार पुनः गणना हुँदा पहिला भएको गणना भन्दा फरक नतिजा आएको र स्वतन्त्र उम्मेदवार राय विजय भएको जिल्ला निर्वाचन कार्यालयले घोषणा गरेको थियो । पुनः गणनामा नेपाली काँग्रेसका उम्मेदवार चौधरीले २ सय ६६ र पराजित भएका रायले २ सय ६८ मत प्राप्त गरेका थिए ।
