१८ कात्तिक, सिन्धुपाल्चोक ।
सिन्धुपाल्चोकमा कोरोना भाइरस सङ्क्रमितको सङ्ख्या बढ्न थालेपछि जिल्ला प्रशासन कार्यालय सिन्धुपाल्चोकले पुनः लकडाउन गरेको छ ।
कोरोना महामारीको जोखिम थप बढ्न सक्ने भएकाले कार्तिक ३० गतेसम्मका लागि सफ्ट लकडाउन सुरु गरिएको जिल्ला प्रशासन कार्यालय सिन्धुपाल्चोकले जनाएको छ ।
लकडाउनको अवधिभित्र सभा जुलुस, जात्रा भोज, भेला, देउसी भैलो लगायत भिडभाड हुने कुनै पनि कार्यक्रम गर्न नपाउने गरी निषेधाज्ञा लागु गरेको प्रमुख जिल्ला अधिकारी वेदनिधि खनालले जानकारी दिए ।
असोजको तेस्रो हप्तादेखि कार्तिकको दोस्रो हप्तासम्म जिल्लामा सङ्क्रमितको सङ्ख्या शून्य दरमा पुगे पनि पुनः कार्तिक दोस्रो हप्ताबाट सङ्क्रमितको सङ्ख्या बढ्न थालेपछि सफ्ट लकडाउन गरिएको हो ।
