२१ कार्तिक, काठमाडौं ।
गुजरातको तटमा रहेको अन्तर्राष्ट्रिय जलक्षेत्रमा पाकिस्तानी सामुद्रिक सुरक्षा एजेन्सी (पीएमएसए)ले गोली चलाउँदा महाराष्ट्रका एक माझीको मृत्यु भएको छ।
समाचार एजेन्सी पीटीआईको अनुसार प्रहरीले गोली लागेर अन्य एक जना घाइते भएका छन्। प्रहरीका अनुसार यो घटना शनिबार साँझ करिब ४ बजेको हो।
देवभूमि द्वारकाका प्रहरी उपरीक्षक सुनिल जोशीका अनुसार जलपरी नामको माछा मार्ने डुङ्गामा सवार महाराष्ट्रको थानेका एक माझीको गोली लागेर मृत्यु भएको छ।
‘डुंगामा सात जना सवार थिए, जसमध्ये एक जना सामान्य घाइते भएका छन्। मारिएका माझी श्रीधर रमेशको शव आइतबार ओखा बन्दरगाहमा ल्याइएको छ,’ उनले भने।
पोरबन्दर नवी बन्दर प्रहरीले यस मामिलामा एफआईआर दर्ता गरेको छ। अरब सागरमा १२ नटिकल माइल टाढा गुजरातको तटमा जे हुन्छ, त्यसको रिपोर्ट यही प्रहरी चौकीमा रेकर्ड हुन्छ।
जलपरी नामको यो डुंगा गत असोज २५ गते ओखाबाटै समुन्द्रमा गएको थियो। यसका सात नाविकहरूमध्ये पाँच गुजरातका र दुई महाराष्ट्रका छन्। प्रहरीका अनुसार घटनाको अनुसन्धान भइरहेको छ।
