२६ कार्तिक, काठमाडौं ।
अन्तर्राष्ट्रिय बजारमा कच्चा तेलको भाउ बिहीबार पनि घटेको छ। अमेरिकामा मुद्रास्फीति बढिरहेकाकारण तेलको मूल्यमा गिरावट आएको अधिकारीहरुको दाबी छ।
पेट्रोलियम निर्यातकर्ता देशहरुको संगठन (ओपेक)ले ऊर्जाको उच्च मूल्यतर्फ औंल्याउँदै तेलको माग प्रक्षेपण घटाउँदा पनि तेल बजार दबाबमा आएको जनाइएको छ।
लन्डन स्थित आईसीई एक्सचेञ्जको कोमेक्स डिभिजनमा बिहीवार दिउँसो प्रतिब्यारेल ब्रेन्ट क्रुडको भाउ शन्ूय दशमलव ६३ प्रतिशतले घटेर ८२ डलर १२ सेन्टमा आएको थियो। बिहानी कारोबार भने यसको भाउ बढेर प्रतिब्यारेल ८३ डलर ३७ सेन्टसम्म उक्लिएको थियो।
उता, अमेरिकी बेञ्चमार्क वेष्ट टेक्सास इन्टरमिडियट (डब्ल्यूटीआई)को भाउ पनि १ प्रतिशतको कमीसहित प्रतिब्यारेल ८० डलर ५१ सेन्टमा पुगेको थियो।
यो वर्षको चौथो त्रैमासमा तेलको माग दैनिक औसत ९ करोड ९४ लाख ९० हजार ब्यारेल रहने ओपेकको मासिक प्रतिवेदनमा उल्लेख छ।यो गत महिनाको प्रक्षेपणको तुलनामा ३ लाख ३० हजार ब्यारेल कम हो। माग कम रहने प्रक्षेपणसँगै तेलको मूल्यमा निरन्तर ओरालो लागेको छ।
