२६ कात्तिक, काठमाडाैँ ।
राष्ट्रिय उपभोक्ता मञ्चका अध्यक्ष प्रेमलाल महर्जनले पेट्रोलियम पदार्थको मूल्य वृद्धिले जनता अत्याधिक मारमा परेको बताएका छन् । शुक्रबार काठमाडौंमा आयोजित एक कार्यक्रममा बोल्दै अध्यक्ष महर्जनले पेट्रोलियम पदार्थको मूल्य वृद्धिले जनता अत्याधिक मारमा परेको बताएका हुन्।
उनले नेपाल आयल निगमलाई जनतासँग फेश गर्न पनि गाह्रो भएको बताए । अध्यक्ष महर्जनले १२ दिनमै सरकारले तेलको मूल्य बढाउनु गलत भएको बताए। उनले विद्यार्थी नेताहरुले मन्त्रीहरुको घर–घरमा गएर आवाज उठाउनु पर्ने बताए । अध्यक्ष महर्जनले सरकारको कूटनीतिका कारण जनता मारमा परेको बताए ।
अध्यक्ष महर्जनले भने, ‘हामी पीडामा परेका छौं । नेपाल आयल निगमको प्रवक्ता आउने कुरा गर्नुभयो, तर मेरो विचारमा आउँदैन होला । आयल निगमलाई अहिले जनतासँग फेश गर्ने अवस्था छैन । १२ दिनअघि मूल्यवृद्धि गर्दा अन्तर्राष्ट्रिय बजारमा मूल्यवृद्धि भएकोले बढाएको भनियो, यो १२ दिनको बीचमा अन्तर्राष्ट्रिय बजारमा मूल्य ४ डलर घटेको छ, अनि आयल निगमले मूल्य वृद्धि भयो भनेर कसरी भन्न सकेको होला । १२ दिनमै खपिनसक्नुभयो, धेरै घाटा भयो भनेर मूल्यवृद्धि बढाइयो । यो गलत हो, भारतीय बजारमा मूल्य बढ्यो अरे, के नेपाल भारतको सिक्किम जस्तो अंग हो र ? भारतसँग मूल्य दाँज्नुको अर्थ नै छैन । ६ दिन अगाडि भारतीय प्रधानमन्त्री नरेन्द्र मोदीले पेट्रोलियम पदार्थमा लगाएको अन्तःशुल्क हटाइदिए, त्यहाँ अहिले प्रति लिटर २३ रुपैयाँ घटाइयो । यता आयल निगमले चाहीँ खालि एकोहोरो रुपमा अन्तर्राष्ट्रिय भाउ बढ्यो भनेको छ । अनि खाली आयल निगम डुब्यो भनेको छ । सुब्बा, खरदारले अफिसको मोटरसाईकल चढ्छ । तर, दैनिक १०५ रुपैयाँ यातायात सुविधा पनि लिन्छ । आयल निगमको कर्मचारी त शेखहरु भएका छन्, नेपालमा शेखहरु खोज्न कहीँ जानुपर्दैन्, आयल निगम गए हुन्छ, सरकारको कूनीतिको कारण आज हामी जनता मारमा पर्नुपरेको छ, विद्यार्थी आन्दोलित हुनुभयो, यो खुशीको कुरा हो । तपाईँहरु नेताहरुको घरघरमा गएर आवाज उठाउनुभयो भने भोलि नै मूल्यवृद्धि घट्छ ।’
