२८ कार्तिक, काठमाडौं ।
नेपाली कांग्रेस केन्द्रीय कार्यसमिति बैठक बस्दै छ।
आसन्न महाधिवेशनको तयारी तथा अन्य विविध राजनीतिक अवस्थाबारे छलफल गर्ने अजेन्डा तय भएको बैठक पार्टी सभापति शेरबहादुर देउवा निवास बूढानीलकण्ठमा बस्दै छ। यसअघि पार्टी कार्यालय सानेपामा बस्ने तय भएको बैठक दिउँसो १ बजे बूढानीलकण्ठमा बस्न लागेको हो।
शनिबार बूढानीलकण्ठमै बसेको पदाधिकारीको बैठकले महाधिवेशन तयारीका लागि विभिन्न अजेन्डा तयार पारेको थियो। आजको बैठकमा ती अजेन्डा छलफल गर्ने तयारी कांग्रेसको छ।
साथै आजको बैठकले निर्वाचन समितिको कार्यतालिकासमेत पारित प्रवक्ता विश्वप्रकाश शर्माले जानकारी दिए। महाधिवेशन सम्पन्न गर्नका लागि विधानमा भएका केही व्यवस्थालाई निलम्बन गरिएको र त्यसको निर्णय गराउने प्रस्ताव केन्द्रीय समितिमा प्रस्तुत गरिने उनले बताए।
प्रवक्ता विश्वप्रकाश शर्माका अनुसार केन्द्रीय निर्वाचन समितिले तयार पारेको १४ औं महाधिवेशन कार्यतालिका आज केन्द्रीय समिति बैठकबाट अनुमोदन गर्ने तयारी छ।
यसैगरी विदेशस्थित जनसम्पर्क समितिले पठाएका क्रियाशील सदस्यको नाम अनुमोदन केन्द्रीय समितिले गर्ने भएको छ। प्राप्त हुन नसकेका देशका जनसम्पर्क समितिलाई निश्चित अवधि उपलब्ध गराउने जनाएको छ।
यस्तै मंसिर २४ देखि २६ सम्म काठमाडौंमा हुने महाधिवेशनका लागि विभिन्न समिति गठन गर्ने अजेन्डा पनि केन्द्रीय समितिमा पेश गरिनेछ।
बैठकमा समसामयिक राजनीतिक घटनाक्रमलगायतबारे पनि छलफल हुनेछ। गठबन्धनले बनाएको राजनीतिक समिति, न्यायालयलगायतबारे पनि छलफल हुन सक्ने प्रवक्ता शर्माले बताए।
पदाधिकारी बैठकमा न्यायालयका विषयमा पनि कुरा उठेको बताउँदै प्रवक्ता शर्माले केन्द्रीय समिति बैठकमा यस विषयमा थप छलफल हुन सक्ने बताए।
