२९ कात्तिक, काठमाडाैँ ।
नेपाली काँग्रेसका नेता प्रकाशमान सिंहले सभापति शेरबहादुर देउवाको घरमा पार्टी केन्द्रिय कार्य समितिको बैठक राखेकोमा असन्तुष्टि व्यक्त गरेका छन् । नेता सिंहले पार्टी कार्यालय हुँदाहुँदै केन्द्रिय कार्य समितिको बैठक सभापति देउवाको घरमा बोलाएकोमा चर्को असन्तुष्टि व्यक्त गरेका हुन् । नेपाली कांग्रेस जिल्ला कार्य समिति, काठमाडौंले सोमबार काठमाडौंमा आयोजना गरेको एक कार्यक्रममा बोल्दै उनले बुढानिलकण्ठ नदेखेको झैं गरेर सभापति देउवाले आफ्नै निवासमा आइतबार केन्द्रिय कार्य समितिको बैठक बोलाएकोमा आपत्ति जनाए ।
डडेलधुरामा सम्पन्न अधिवेशनहरु अमान्य
नेता सिंहले सभापति देउवाको गृहजिल्ला डडेलधुरामा सम्पन्न भएका वडा तथा पालिका अधिवेशनहरु मान्य नहुने चेतावनी समेत दिए । उहाँले सत्ताको दूरुपयोग गरेर पुलिसको घेरामा राखेर डडेलधुरामा गरिएको अधिवेशन मान्न नसकिने अडान राखे । नेता सिंहले क्रियाशील सदस्यताको विवाद देखिएको ठाउँमा पूरानै क्रियाशील सदस्यलाई मान्यता दिने पार्टी केन्द्रिय कार्य समिति बैठकले गरेको सर्वसम्मत निर्णय तत्काल कार्यान्वयन गर्न पनि पार्टी नेतृत्वलाई दवाव दिए ।
उनले भने, ‘पार्टी केन्द्रिय कार्य समितिको बैठक पार्टी सभापतिको घरमा राख्छ । हिजो मैले बोले । कार्यालयमा राख्नु प¥यो नि वर्किङ कमिटी भनेर । भवनको के काम । बुढानिलकण्ठ हामीले नदेखेको हो र भन्या । उहाँको त्यहा घर बन्नुभन्दा अघि नै हामी त्यहाँ बुढानिलकण्ठ भगवानको पूजा गर्न जान्थेऊ नि त । अनि एक दिन नाघि सक्यो–रौंतहटका साथीहरु धर्ना बसेको बस्यै । के दशंै, के तिहार, के छठ । पार्टी कार्यालयमा छिँडीमा बसेको बस्यै छ । मैले भने कि किन यस्तो गर्छौं केन्द्रिय कार्य समितिले त सर्वसम्मत निर्णय गरेको हो । जुन जिल्ला, जुन क्षेत्रको जुन वडाको जहाँ प्रोबलम छ । विधि र नियम अनुसार सम्बोधन गर्न प्रयास गरौंं । एक्टिभ मेम्बरसिपमा विवाद भयो भने । होईन भने समय बित्न लाग्यो भने स्थगनमा राखौं । र पूरानैबाट गरौं भनेर त सर्वसम्मतिले पारित गरेको छ नि । यहाँ त अरु पार्टीबाट प्रवेश गरेको नाममा, समायोजनको नाममा निर्वाचन अधिकृत खटि सकेको छ । भोटलिष्टमा समायोजनको लिष्ट एउटा छ, समायोजनको लिष्टमा नभएका नामहरु राखेर पर्सादेखि विशेष गएर प्रदेश २ मा त्यस्तो भईराखेको छ । अरे बाबा के गर्ने, हाम्रै पार्टी सभापतिको गृह जिल्लामा के गर्नु भयो ? के राम्रो भएको छ ? अहिले उहाँले सुनिराख्नु भएको छ नि त । त्यहाँको जिल्ला सभापतिले के भयो भन्ने कुरा । यो संगठन पकड गरेर विधि र नियम पूरा नगरीकन पुलिसको घेरामा म सत्तामा छु भन्दैमा पुलिसको घेरामा राखेर नभएको अधिवेशन भो भनेर घोषणा गर्दैमा हुन्छ ? यसले पार्टीलाई राम्रो गर्दैन ।’
राजनीतिक न्याय दिन पनि पार्टी नेतृत्वसँग माग
नेता सिंहले राजनीतिक न्याय दिन पनि पार्टी नेतृत्वसँग माग गरे । उनले विधि र नियम उलंघन गरेर पार्टी नेतृत्वले सधैं कार्यकर्तालाई अन्याय गरेकाले आफूहरुले राजनीतिक न्यायको खोजी गर्नु परेको तर्क समेत गरे । उनले पार्टी नेतृत्वले अव महाधिवेशन सार्ने अवस्था भने नरहेको बतए ।
