काठमाडौं : नेपाल वायुसेवा निगमले बोइङ भन्दै एयरबसको वाइड बडी जहाज भारतको नयाँ दिल्ली पठाएका कारण उक्त जहाज ६ घण्टासम्म उतै अड्किएको खुलासा भएको छ । आजको नागरिक दैनिकले समाचार छापेको छ ।
नयाँदिल्लीस्थित इन्दिरा गान्धी अन्तराष्ट्रिय विमानस्थलमा निगमको पहिलो वाइड बडी जहाज अन्नपूर्ण बुधबार दिउँसो २ः४० बजे काठमाडौं उडान भर्ने तालिकामा भए पनि त्यसको ६ घण्टासम्म त्यहीँ रोकिएको थियो ।
निगम व्यवस्थापनले बुधबार आफ्नो लापरबाही ढाकछोप गर्न भारतीय इन्जिनियर अनुपस्थित हुँदा उडान अनुमति पत्रमा हस्ताक्षर गर्न नपाइएको र उडान तीन घण्टासम्म रोकिएर सँझ ६ बजे काठमाडौं अवतरण गरेको जनाएको थियो ।
निगमकै एक उच्च अधिकारीका अनुसार एकथरी जहाज भनेर अर्कै पठाउँदा दिल्लीमा वाइड बडी ६ घण्टा रोकिएको जानकारी दिए ।
नेपालबाट १ सय ९० सिट क्षमताको बोइङ ७५७–२०० सिरिजको जहाज दिल्ली पठाउने भनेर जानकारी गराइयो, ती अधिकारीले भने तर, जाने बेलामा बोइङको सट्टा २ सय ७४ सिटे एयरबस ३३०–२०० सिरिजको वाइड बडी गयो ।
