८ मंसिर, धनगढी ।
नेकपा माओवादीका अध्यक्ष पुष्पकमल दाहाल’प्रचण्ड’ ले अमेरीकासँग ऋण र अनुदान सहयोग नलिने भन्ने कुरै नहुने बताएका छन् । बुधबार कैलाली विमानस्थलमा पत्रकारहरूसँगको कुराकानीमा अध्यक्ष दाहालले यस्ताे बताएका हुन् ।
अध्यक्ष दाहालले एमसीसीका सम्बन्धमा हालै अमेरिकी विदेश सहायक मन्त्री नेपाल आएका बखत यसबारेमा खुलेरै छलफल भएको बताए । उनले भने, ‘अमेरीकासँग ऋण र अनुदान सहयोग नलिने भन्ने कुरै हुँदैन । छलफल गम्भीर ढंगले चलेको छ, जनतामा उठिरहेका प्रश्नको जवाफ नदिएर ऋण अनुदान नलिने, फिर्ता लैजाउ भन्ने कसैको धारणा छैन ।’
एमसीसीकै बारेमा अध्यक्ष दाहालले गठबन्धनभित्र सुरुमा भएको ओरिजनल सहमति तिर जाने कि भन्ने चर्चा पनि भएको बताए । तर जनतामा व्यापक रुपमा चासो उठेको विषयमा दलहरू भित्र मात्र होइन, सञ्चारक्षेत्र, नागरिक समाज सवै प्रमुख दलहरूका बीचमा छलफल चलाएर अघि बढने गठबन्धनमा छलफल भएको उनले बताए । ‘एमसीसीका सम्बन्धमा लुकीछिपि केही हुँदैन,’ उनले भने ।
उनले सर्वोच्च अदालतमा देखिएको समस्याले केही दिनभित्रै समाधान हुने बताएका छन् । अदालत आफैंले समस्या समाधान गर्नु पर्ने सरकारमा रहेका गठबन्धन दलहरूको सोच रहेको बताउँदै उनले सम्भव नभए गठबन्धनको बैठक बसेर यसबारे के गर्ने भन्ने छलफल गरेर निकासका लागि पहल गरिने बताए । ‘सर्वोच्चको समस्या ठूलो समस्या हुन्छ भन्ने लागेको छैन,’ उनले भने ।
अध्यक्ष दाहालले गठबन्धन दलको संयन्त्र बनाइएको विषयमा विभिन्न टिकाटिप्पणी भइरहेको भएपनि यो संयन्त्र सरकार भन्दा माथि नभएको र गठबन्धनदलका बीच आपसी समझदारी बलियो बनाउन बनाइएको दाबी गरे ।
