१९ मंसिर, चितवन ।
प्रमुख प्रतिपक्ष दल नेकपा एमालेले पर्यटकीय क्षेत्र चितवनको सौराहमा आफ्नो १० औँ राष्ट्रिय महाधिवेशन सम्पन्न गरेको छ । चितवनलाई महाधिवेशनस्थल रोज्नुको एक कारण त्याहाको पर्यटन प्रर्वद्धन गर्नुपर्ने एक रहेको बताइएको थियो । एमालेको महाधिवेशनस्थल बनेपछि त्यहाँका व्यवसायी पनि खुशी बने ।
महाधिवेशनमा हजारौ एमालेका नेता कार्यकर्ता चितवन पुगे । महाधिवेशनको समयमा चितवनका होटल र रिसोर्टहरुमा देखिएको भीड वर्षाैपछिको भिड थियो । यो भीडबाट त्याहाका पर्यटन व्यवसायीले लाभ लिएका छन् । कोरोनाले शिथिल बनेर भर्खरै चलायमान भएको पर्यटन क्षेत्रमा यसले सकारात्मक टेवा पुर्याएको छ । तर यसो भनिरहदा चितवनको सौराहा आसपासका खुद्रा तथा साना व्यवसायीहरुले भने महाधिवेशनताका आशाअनुरुपको व्यापार नभएको गुनासो गरेका छन् ।
कोरोना संक्रमणको जोखिमले बन्द भएको होटल पर्यटनलाई महाधिवेशनले जीवन दिएको भन्दै चौतर्फी चर्चा भए पनि सौराहा आसपासलाई भने सकारात्मक प्रभाव पार्न सकेन । महाधिवेशनका लागि पुगेका प्रतिनिधिहरु सौराहा र नारायणी किनारमै केन्द्रित भएकोले आशा गरेअनुसारको व्यापार हुन नसकेको व्यवसायीहरु बताए । महाधिवेशनमा चितवन पुगेका नेता, कार्यकर्ता र प्रतिनिधिहरु अधिकांशले सौरहामा नै होटल बुकिङ गरेको र दिउँसोको समयमा अन्यत्र घुम्न जान नपाएकोले पनि अपेक्षाअनुसारको व्यापार हुन नसकेको व्यापारीहरुको बुझाइ छ ।
देशभरबाट प्रतिनिधिहरु आउने भएपछि व्यापार फस्टाउँछ भन्ने सोचे पनि त्यो अनुसार व्यपार नभएको साना व्यवसायीहरुको गुनासो छ । आयोजक पक्षले सौराहा र नारायणी किनारलाई मात्रै केन्द्रित नगरी विभिन्न चोकतिर पाहुनाहरुका लागि आकर्षक कुरा राखिदिएको भए साना व्यवसायीहरुको व्यापार फस्टाउने उनीहरुको भनाइ छ । साना व्यवसायीहरु समेट्न मानिस र सवारीसाधनको भीडलाई व्यवस्थित गरी अन्यत्र ठाउँमा सवारीसाधनको पार्किङको व्यवस्था गर्दै पैदल जाने व्यवस्था गर्न सकेको भए आफूहरुले पनि ब्याबसाय उकास्ने मौका पाउने आशा गरेको उनीहरुले बताए । कार्यक्रम ठूला होटल र रेष्टुरेण्टमा मात्रै केन्द्रित हुँदा देशभरका मानिसहरुले स्थानीय खानाको स्वाद लिन नपाएको पनि व्यवसायीहरुले बताएका छन् ।
व्यवसायीहरुले महाधिवेशनमा गएका पाहुनाहरुलाई लक्षित गरेर व्यवसाय सञ्चालन गरे पनि अपेक्षाअनुसारको व्यापार नभएको बताउँछन् । महाधिवेशनस्थलमा आयोजकहरुले साना व्यवसायीहरुका लागि छुट्टै स्टलको व्यवस्था गरेको भए साना व्यवसायीहरु पनि लाभान्वित हुनसक्ने उनीहरुको दाबी छ । नेकपा एमालेको १० औँ राष्ट्रिय महाधिवेशन गत मंसिर १० देखि १४ गतेसम्म सञ्चालन भएको थियो ।
