१९ मंसिर, काठमाडौं ।
स्पिनर अजय चौहान र तीव्र गतिका बलर दुर्गेश गुप्ताको उत्कृष्ट बलिङसँगै लुम्बिनी प्रदेशले यू–१९ राष्ट्रिय क्रिकेट प्रतियोगिता च्याम्पियन बनेको छ । लुम्बिनीले आइतबार टियु क्रिकेट मैदानमा भएकाे फाइनलमा सुदूरपश्चिम प्रदेशलाई १ सय १३ रनको फराकिलो अन्तरले हराउँदै च्याम्पियन बनेको छ ।
२ सय १३ रनको विजयी लक्ष्य पछ्याएको सुदूरपश्चिम २८.३ ओभरमा ९९ रनमा अल आउट भयो । सुदूरका लोकेश बमले ३९ बलमा ४ चौका सहित सर्वाधिक २५ रनको योगदान दिए । अन्य कुनैपनि ब्याटरले राम्रो प्रदर्शन गर्न सकेनन् । तीव्र गतिका बलर दुर्गेश गुप्ताले पाँचौं ओभरको पाँचौं बलमा नरेन भट्टलाई दुई रनमा विकेटकिपर प्रज्वल थापाबाट क्याच गराउँदै पहिलो सफलता दिलाए । नरेन एज लागेर आउट हुन पुगेका थिए । सातौं ओभरको अन्तिम बलमा राहुल भण्डारीलाई गुप्ताले एक रनमा एलबीडब्लू आउट गरे ।
१२ औं ओभरमा मोम्मद हसनले दुई विकेट लिएपछि लुम्बिनी खेलमा हाबी बनेको थियो । दोस्रो बलमा बसन्त कार्की ७ रनमा बोल्ड आउट भए । दुई बलपछि इन स्वींग बलमा खडक बहादुर बोहरा २१ रनमा एलबीडब्लू धराप परे । दुर्गेशले नै प्रमुख ब्याटर अर्जुन साउदलाई ९ रनमा एलबीडब्लू आउट गरेपछि सुदूरको जितको सम्भावना पातलिएको थियो ।
त्यसपछि स्पिनर अजय चौहानले सुदूरलाई धरासय बनाए । अजयले नारायण जोशीलाई ११ रनमा बोल्ड आउट गरे । लोकेश बम ठूलो सट खेल्ने क्रममा लङअफमा विराट भण्डारीबाट क्याच भएपछि सुदूरको च्याम्पियन बन्ने सपना सकियो । लुम्बिनीका स्पिनर अजय चौहानले ५.३ ओभरमा २० रन खर्चेर सर्वाधिक ५ विकेट लिए । दुर्गेश गुप्ताले ९ ओभरमा ३ मेडनसहित १९ रन खर्चेर ३ विकेट लिए । मोहम्मद हुसैनले ८ ओभरमा १ मेडन सहित ३३ रन खर्चेर २ विकेट लिए ।
त्यसअघि टस हारेर ब्याटिङ थालेको लुम्बिनीले ५० ओभरमा २ सय १२ रनमा अल आउट भयो । लुम्बिनीका कप्तान देव खनालले ९५ बलमा ५ चौका र ४ छक्कासहित सर्वाधिक ७० रनको योगदान दिए । विशालले ६९ बलमा ४ चौका र २ छक्का सहित ५१ रन जोडे । तीव्र गतिका बलर आकाश चन्दको १७ औं ओभरको अन्तिम बाउन्सर बलमा वैकल्पिक फिल्डर कैलाश ऐरीले कभरमा देव खनालको ४१ रनमा क्याच छाड्न पुगेका थिए ।
तीव्र गतिका बलर हेमन्त धामीले पहिलो ओभरको दोस्रो बलमै ओपनर शून्यमा आउट भएका थिए । दोस्रो विकेटका लागि प्रज्वल थापा र देवले ७८ रनको साझेदारी गरे । प्रज्वल ५३ बलमा ३ चौका र १ छक्का सहित २४ रनमा क्याच आउट भए । आकाशको १९ औं ओभरको अन्तिम बलमा थर्डमा नरेन्द्र साउदबाट क्याच भएका थिए । स्पिनर शेर मल्लको बलमा विराट भण्डारी विकेटकिपर अर्जुन साउदबाट क्याच हुँदै गोल्डेन डक पेभेलिएन फर्के ।
देव आकाशको २९ औं ओभरको अन्तिम बलमा एज लागेर खडक बोहराबाट क्याच हुन पुगेका थिए । सुनिल भण्डारी ६, बशिर अहमद ४ र कमल वली १ रनमा आउट भए । तल्लोक्रमका दुर्गेश गुप्ताले ३३ बलमा ३ चौका र १ छक्का सहित ३२ रनमा बोल्ड आउट भए ।
सुदूरपश्चिमका आकाश चन्दले १० ओभरमा ४७ रन खर्चेर सर्वाधिक ३ विकेट लिए । स्पिनर शेर मल्लले १० ओभरमा १ मेडन सहित १७ रन खर्चेर २ विकेट लिए । हेमन्त धामीले १० ओभरमा २ मेडन सहित ३७ रन खर्चेर २ विकेट लिए । नरेन्द्र साउद र राहुल भण्डारीले १–१ विकेट लिए ।
लुम्बिनी लिगमा ६ खेलमा ५ मा जित र १ मा हार सहित १० अंकका साथ शीर्ष र सुदूर ६ खेलमा ४ मा जित र २ हार सहित ८ अंकका साथ दोस्रो स्थानमा रहँदै फाइनल खेलेका थिए ।
